محتويات الإدراج الذي تريد إرساله:
يا حبيبتى يا مصر
هل تقدر تاخد حقك
كنت بتفرج من يومين على برنامج خلف الاسوار وموضوع الحلقه كان عن شباب جرفهم الادمان الى ان هما ينتحلوا دور ضباط شرطه وبعربيه بوكس بيمروا فى اعرق شوارع مصر ( بيقولوا شارع جامعه الدول العربيه وووو) المهم ان هما بيوقفوك وبيسالوك عن اللى معاك وبيحرزوا أى فلوس وبيعدوها وبعد كده بيسلمهالك فى ظرف مقفول
طبعا بتكون اتبدلت بورق ابيض وقد يكون ألوان والكلام دا من إمتى من سنه 2007
اه نسيت أقلكم ان هما كانوا معاهم بطاقات مزوره يعنى حتى لو سألته عن تحقيق الشخصيه مش هتكشفه
الحل الوحيد انك تطلب منه انك تروحوا القسم ..ههههههههههه
طبعا ربنا يوفق الجميع
اللى يهمنى من الموضوع ده ان فى حوار المذيع مع أحد قاده الشرطه قاللوا طيب وايه المطلوب مننا
رد عليه بان الشخص كان المفروض ان الناس تساله عن تحقيق شخصيته
انا بصراحه مش عارف هل فى حد منكم عنده الشجاعه انه يطلب من ضابط شرطه ما يثبت شخصيته ؟
انا لا اتعقد ... واكيد انتم عارفين الاجابه .
المهم اللى نفهمه من كل ده حاجتين
الاول هو قمه الجهل : انك متبقاش عارف حقوقك
التانى هو قمه الذل : انك تبقى عارف حقك لكن خايف تسال عليه ؟
هابسطهالكم
كنت راكب فى يوم من الايام اللى شبه بعضها الميكروباص وكنا اربعات فى الكرسى الواحد طبعا دى بقت ظاهره صحيه فى كل حته
حتى انت تحس ان انت لو قعدت تلاتات ان فى حاجه غلط يا ترى انا بحلم ؟ يا ترى انى قاعد
تلاتات كده ان الامر طبيعى
المهم كانت الدنيا ساقعه اوى والكل مقفل الشبابيك ....طيب وبعدين
وبعدين لقيتلكم السواق واللى جنبه واللى جنب اللى جنبه بيدخنوا ...بس .. لأ لسا
لقيت الاتنين اللى ورايا كمان بيدخنوا .. بقينا قاعدين فى مدخنه
طيب اذا كان جنب السواق قاعد 2 واربع كراسى ورا بعض كل منهم فيه 4 ركاب
يبقى اللى مركز معايا ؟ كام واحد بيدخن من ضمن كام واحد ؟
بغض النظر ...... هل دا اسلوب
لا طبعا مش اسلوب ولا أدب ولا أى حاجه ..اما يبقى الناس دى معندهاش دم من نفسها ولما يبقى فى العربيه اطفال او بنات من ذوى الرئات الناعمه والأنوف الحساسه نعمل ايه ؟ قلت اكيد انا هلفت انتباههم .. وهما اكيد هيبطلوا من نفسهم
وبعدين يا دوب المسافه من ميت غمر للزقازيق نص ساعه ..حبكت يعنى
المهم اتكلمت كالاتى .
انا : لو سمحت احنا صدرنا وجعنا من السجاير ممكن حضرتك تبطل
هو : افتح الشبابيك
انا : بس الدنيا ساقعه
هو : خلاص انا مش هطفى حاجه واللى عاوز تعمله تعمله
اقولك عند أى كمين ووقفنى
انا: كلمه حلوه وكلمتين حلوه يا بلدى
السؤال بقى : هل ممكن أوقفه فى كمين ؟ يا ترى لو أنا وقفته واشتكيت للعسكرى الى واقف فى كمين أم الزين
بأن السواق وأربعه كمان بيدخنوا هيكون رد فعله ؟
هل هيوقف العربيه ويقوللى اتفضل يا سياده المواطن المحترم انت اكيد عندك حق ومن حقك تشم هوا نظيف ولو على الاقل فى المناطق المقفله زى حقوقنا وفى النهايه القانون هياخد مجراه .
ولا ودا اللى اكيد هيحصلى علشان كده احنا مقدما مبنتعبش نفسنا ونشتكى :
ان هو هيقوللى إنت مخك تعبان يا ابنى . احنا فاضيينلك اجرى يا بنى الحق محاضرتك يا شاطر لأحسن الدكتور يمدك على رجلك ولا يذنبك .. ويضحك هو وأمناء الشرطه على ويضحك على الراجل اللى انا عاوز اخد حقى منه .
وبعدين هو حقى لوحدى ما انا كان معايا ناس تانيه لكن متفهمش كلهم عمالين يكحوا وبرده مبيعترضوش ...
فعلا شعب أذله لمن غلب على رأى هيرودوت
انتم عارفين احنا عاملين ازاى : زى اللى اتلسع من الشوربه بس منفخش فى الزبادى لأ دور على حاجه تانيه يتلسع منها
لأننا فى النهايه برده بنتلسع
وممكن برده لأنه مش لاقى حاجه يعمل عليها شوربه فقرر انه يتلسع من حاجه تانيه
وعلى العموم لا داعى للقلق انت مواطن لك حريات وعليك واجبات والحمد لله انت بجد وأسف فى اللفظ بتتنفخ فى الواجبات ومبتلاقيش معظم حقوقك
وفى الأخر بمسى على أم حسن وبهديها سلامى واقولها :
حلاوتها أم حسن
محمد علاء الصقار
|
