عريت لمخبي فيَّ

و نڨيت كلامي من لبهوتْ

نقشت حروف ب يديَّ

نشوف راسي قبل ما يفوت الفوتْ

سگيتْ لحروف ف گصْعَة الوراقْ

و القلم مدادُه راوي

الساكن لي ساكني فاقْ

نهبش ف الراس على كلام الضَّاوي

رسمت شلة طرقان ب نْعالِي

و حتى طريق ما تسَگْماتْ

فين ما رسمتْ طريق ف خيالي

تهرب ف طريقي كل الحَلْماتْ

يا ذاك الحالم فيق وُ فَيَّقْ دواخلك

منجج لحروف ما يْدَفِّي

الكلمة عْرَى و المعنى ف بالك

غُرْبالْ الوقت الگارْحَة ما يْصَفِّي

حلم و زيد حلم و قيَّسْ

الدنيا راها تْحَنَّتْ الحديدْ

فصل الحلمة على ڨدَّكْ و لْبَسْ

الرَّاشي  راشى بَعْدما كان جديدْ

دَوَّرْتها فْ راسي دورَة

و ڨلت الحَلمَة نديرْ لها لجامْ

نَحْفَرْ و نخَبِّيها فْ مَطْمُورَة

نَتْهَنَّا وُ يَتْهَنَّا راسي مَنْ التَّخْمامْ

حلَمْتْ بَ حْرُوفي لابْسَة سَلْهامْ لَمْعانِي

وُ راسْ القلُم دافي بَ عْمَامَة لَمْدادْ

حلمت ب الورقة حاضنة ريقْ لساني

و القلم ف صْبَاعِي مَنْجَلْ حَصَّادْ

حلمت ب كلام مصبوغ ب الحكمة

يفَيَّقْ قلوبْ لَحْجَرْ

يَخْرُجْ مَنْغومْ بَ نَغمَة

لمعاني گادْيَة كُلْهَا جْمَرْ

حلمت ب كلامي يمشي هازْ حْرُوفًُُه

ينڨّي لحروف مَنْ النُّخالَة

المعنى مدزوزة من صوفُُه

قرشاله حَكْمَة ماشي جْهالة

قلت يا حسرة نْعَرِّي لمْخَبِّي فِيَّ

و الحلمة نديرْ لِهَا جْنَاحْ

ريشُه يا حسرة سْمَحْ فِيَّ

و ذاك لَمْخَّبِي فِيَّ طاحْ