طالب ضيف الله عندكم لا تردوني

بردعة من الحروف ع الظهر

نقسموا الهم و الحمل فهموني

نقسموا اللغا و معاه الصبر

كلامي مدزوز ب موس حافي

الحروف لي كانت مورقة ذبلات

معلول ب المعنى الله يشافي

هجراتني قصايدي و ما ولات

جييت ب الحفا

الكلام حرفة

و نقش ب المداد

القصايد تلفة

الراس جلفة

محسوك ب منجل حصاد

ديت و جبت ف الحروف

كلام منخوض ف شلة شكاوي

العاقل ب عقيل مخطوف

و الحمق شلة آش ناوي

طالب ضيف الله عندكم و الحمية

بعت حروف كلامي و بعت السمية

بعت القلم و شربت لمداد

بعت اللوحة و دفنت البلاد

قلت بهم نشري راسي

قلت بهم نحد باسي

و نصالح موكة مع عمي الديب

و نولي مول الشكارة و مول الجيب

من راسي طجيت

و القلب ف دواخلي مهراز

يدق في الا نسيت

و ينغز القصيدة ب حرف مهماز

يا ذيك الحروف الساكنة في

انا جيتك اليوم طالب ب النية

سرجي عاود لقصيدة

و دري نادر لمعاني

جيت من بلاد بعيدة

الحرف المنقوش جلاني

كتبتك ب الريح ...

و كتبتك ب الما

زين حروفك يطيح

هجراتني الكلمة

طلبت ضيف الله عندكم يا اصحابي

لا تردوني ل حرفة الكلام

حرفة الحروف هجرت بابي

نكون منكم سارح النعام