محتويات الإدراج الذي تريد إرساله:
الريح
عايطة مهزوزة ف الريح
و شكون سمع لها
كلام يسيل و يطيح
حتى حد ما داها فيها
*************
غوتة مسموعة كارحة
حروفها حركة و بارود
معاني ف الدم سارحة
تحل عقل ذاك المسدود
*************
يا ذيك المسوكة ب الظلمة
راه الليل تابعه الفجر
مهما كبرت ف دواخلك الحلمة
ف صباحك تطير و ما تظهر
*************
بويا يا بويا حلم على قدك
الحبل لمدلي ف البير خاصه الفتلة
كيف تدير يا بويا و انت قليل جهدك
راه الدراع لمصدي ما يهز عتلة
*************
حرث و حصد و تسنى الغلة
يمكن الغيمة تجيبها ذيك الريح
طعم و راري ب يذيك النقلة
اياك تقلع السبولة و تزرع الشيح
*************
يا الدافن الحلمة ف مطمورة غدا
قال يخليها ل دواير الزمان
تصالح مع راسك و به تبدا
حفر طريقك و زيد ل قدام
*************
عييت ما نحقق ف داك الغاشي
واش يجيب معاه
خيال مغطياه البهوت و راشي
طج الخير من حداه
*************
حفرت ب ظفاري داك البير
لقيته غارق و نفسي فيه عايمة
لي مثقوب له الدلو آش يدير؟
يا المعول ع المطفية راها ما دايمة
*************
حطيت راسي بين الريوس
حليت عين و سديت وحدة
المحلولة تبكي ع الهم المنكوس
و ذيك المسدودة طامعة ف حلمة غدا
*************
الزمان حديدة ماضية
زكروم بابه مصدي
النفس الباردة راضية
و السخونة غير ك تعدي
*************
|
