مَدْهُونْ اللسَانْ

الخروفْ سَوَّلْ النَّعْجَة :

واشْ گاعْ لّي ياكُلْ اللحَمْ نسَمِّيوَهْ ديبْ؟

ڤالَتْ لِهْ:واشْ تڨولْ فْ ليّ يَبَدَّلْ السّيفَة

و يّاكُلْ العْرَڨْ و الجّيفَة

و يَقراها قْرايَة الحْسيفَة!؟

شكونْ يخَفَّفْ عْلَيَّ وَ يهَزّ هْبَالي؟

مَنْ غيرَكْ يَا الواقفَة فْ الرِّيحْ

شَمْعَة تْنَوَّرْ ظلامي

الخيرْ وَ الحُبْ من يدّيكْ يْسِيحْ

حْياتِي حَلْمَة

نْلَخَّصْهَا فْ كلْمَة

الْهَمْ وَ الغَمْ

وَ الْفَقَرْ فْ الدَمْ

خْرَجَتْ للَدَّنْيَا صْغِيرْ

نَحْلَمْ ، فَرَخْ فْ السْمَا يَطِيرْ

شَفَتْهَا سْحَابَة

شَفَتْهَا غابَة

دَنْيَا حَمْقَا كَذَّابَة

خْذِيتْ حَقِّي مَنْ الَحَرْفْ

وَ الفَرَحْ فِيَ مَمْنُوعْ مَنْ الصَّرْفْ

دَقِّيتْ فْ بابْ الحُرِيَّة

لقيتُه عْوَافِي

هِيَ حْبَاسَاتْ مَنْسِيَّة

الكلامْ فْ الَعْذابْ ماشِي كافِي

ياكْ الشُّوفَة فْ الَبْحَرْ

تَعَلْمَكْ كيفْ انْتَ صْغِيرْ وُ ضْعِيفْ

راسِي ، سَاكَنْ وُ كُلُّه غْدَرْ

بِينَكْ وُ بينْ الَقْبَرْ خَيَطْ رْهِيفْ

ياكْ الوَقْفَة فْ الجْبَلْ

بْطُولُه كُلُه حَكْمَة

قامْتَكْ وُ هَامْتَكْ تَذْبَلْ

لِي حْگر العُودْ يَتَّعْمَى

ڨلتْ نَعِيشْ

كيفْ مْقَدَّرْ لِيَ

بَ رْزَانَة وُ طِيشْ

مْعَدِّي وُ لا بَ ثقِيَة

قْطَعَتْ جْبَالْ وُ وِيدَانْ

شَفَتْ شَلَّة وْجُوهْ وُ غْرَايَبْ الانْسَانْ

شَفَتْ الكلمَة مَجْرُورَة

بَ الكَسْرَة الَمْقَدْرَة عَ الڨلبْ

شَفَتْ النفُوسْ مَضْرُورَة

بَ النَّعَتْ التَّابَعْ للنَّهْبْ

شَفَتْ كلامْ مَذهُونْ بَ الڨرْشْ

شَفَتْ بنادَمْ يَمْشِي وُ هُوَ نَعَشْ

قْرِيتْ النَّظْرَة

وُ فْهَمَتْ الَحْرُوفْ

نْسَجَتْ هَضْرَة

غْزَلَتْ قْصَايَدْ مَنْ الصُّوفْ

لا الكلامْ كلامِي

وَ لا لَحْلامْ احْلامِي

ضَيَّعَتْ فْ الطريقْ احْلامِي

وُ غَرْقَتْ فْ دْوَاخْلِي الحَلْمَة

ضَاعْ الَكْلامْ مَنْ كلامِي

حتّى نَدْبَتْ عْلِيَ الكلمَة

اللسَانْ مْكَبَّلْ بْ لَحْزَانْ

وُ العَيَنْ مَطْمُورَة غَلَّتْهَا حَسْرَة

الڨلبْ مَنْ ظلامُه ڨطْرَانْ

يَجيفْ فْ كُلْ قُطْرَة وُ قطْرَة

شِي طاعْ

شي ضَاعْ

شِي شَڨ المُوجْ

شي جاعْ

شي باعْ

وُ انَا وُ ڨلبِي بْزُوجْ

قارْقينْ عَ التْرَابْ

وَ عْلَى ذيكْ السْبُولَة

سَبَّة مَنْ شَلَّة اسْبَابْ

عَسَى تْفَرَّخْ الَعْجُولَة

ذيكْ السْبُولة لَكْحَتْ

وُ سَلْمَتْ بَ مَكْتُوبْها

لاحَتْ النُخَّالَة وُ طَجَّتْ

وُ نَكْراتْ حْبُوبْهَا

وَ الترابْ هُوَ التْرَابْ

ما تَغَيَّرْ ما تْبَدَّلْ لونُه

فَقَّصْ وُ فَرَّخْ غْرَابْ

وَ تَسَيَّفْ لَ ضْبَعْ بَ ڨرُونُه

اللسانْ مَذْهُونْ

ما يَعْرَفْ مْقَاوْمَة

بَ الخُوفْ مَسْكُونْ

الذَّلْ وُ الَمْسَاوْمَة

السَّنْ يَضْحَكْ لَ السَّنْ

وَ الڨلَبْ فِيهْ خْديعَة

الضّعِيفْ مَنَّا اِلا حَنْ.....

يَوَزْعُوا لَحْمُه فْ الَوْزِيعَة

وُ بْقِيتْ انَا وُ ڨلبِي بْزُوجْ

هازِّينْ يَدِّينَا

لْ خَيَلْ مْشَمْرَة بَ سْرُوجْ

اِلا بْغَاتْ تَنْفِينَا

نْدُقَوا فْ الضْلوعْ

وَ نْدُخْلوا سُوقْ الرََّاسْ

الڨلبْ فِيَّ يَطُوعْ

وَ انَا عْلى بَابُه عَسَّاسْ

لَحَتْ عَيْنِي هْنَا وَ لهِيهْ

وُ عَلقْتْ فَ كتافِي الرْجَلْ

النْظرْ ما كانْ عْلِيَّ نْخَلِّيهْ

وَ الرْجَلْ مَقْطُوعَة مَنْ الْمَفْصَلْ

مْيَاتْ تَخْمِيمَة وُ تَخْمِيمَة

وُ لا ضَرْبَة بْ الَمْقَصْ

مْيَاتْ حَلُّوفْ وَ بْهِيمَة

وَ لاَّ واحَدْ خْرَصْ

لسَانُه طْوِيلْ ...

مَعْڨودْ مَنْ لهَاتُه

الذلْ فِيهْ يَسِيلْ

حَتىَّ الحَجْرَة ما شَبْهَاتُه

الرَّاسْ گفَّة مَثقوبَة مَنْ الڨاعْ

ما تْكَيَّلْ عْلِيهَا زْرَعْ وَ لاَّ نَعْنَاعْ

 يَشوفْ يَنَفَّدْ وُ يَسْمَعْ

وُ فْ خاطْرُه مَضْرُورْ

بنادَمْ بَ لْسَانْ ضْبَعْ

وُ يْڨولْ : أنَا مَسْتُورْ

شَدِّيتْ راسِي بينْ يَدِيَّ

وَ الڨلبْ عْفَسَتْ عْلِيهْ

وُ ظلِّي يَا حَسْرَة سْمَحْ فِيَّ

مَليِّ انَا حْتَاجِيتْ لِهْ

باعْ لسَانُه فْ سُوقْ الدْلالَة

وُ الَعْقَلْ دَفْنُه فْ الطَّينْ

باعُه وَ شْرَى جْلالَة

دَرْدَرْهَا فْ العِينْ

خْرَصْ ، عْمَى وُ زَحَّافْ

مَجْمُوعِينْ فِيهْ

ما حْبَى مَا تْكَلَّمْ ما شافْ

ب الذَّلْ لِي مْعَشَّشْ فيهْ

وُ ضاعْ بنادَمْ

مَلِّي ذهَنْ بَ الخُوفْ لسَانُه

راضِي وَ لا نادَمْ

تَرَّاسْ بَ اللڨمَة فْ جْنَانُه

 السْرِيطْ وُ اللهِيطْ

بَ الذَّلْ وَ اللغِيطْ

السَّوَطْ وَ الشْرِيطْ

الَعْصَا وُ الَخْبِيطْ

وُ سَوَطْ الباشا المَفْتُولْ

زادْ فَتْلَة عْلى فَتْلاتُه

فْ الجَّلدْ وَ الظهَرْ يَجُولْ

حتىَّ يَدْ مَا حَبْساتُه

وَ حْمَارِي وْقَفْ فْ العَڨبَة

وُ لاحْ ڨلبِي لِي فْ الشْوَارِي

رْكَلنِي فْ الرَّكْبَة

وَ عْفَسْ عْلَى افْكارِي

وُ هَكذا كانْ وُ ما كانْ

رْبَطْ تَخْيَالُه فْ الَمْكَانْ

يَهْبَشْ فْ المَاضي وُ لِّي كانْ

بينْ الَحْدِيدْ ، الهَمْ وُ القَضْبَانْ

يَنْقُشْ شَلَّة حْرُوفْ

على ظْهَرْ ذيكْ الصَّخْرَة :

السَّوَطْ يَوَلَّدْ الخُوفْ

وَ الذَّلْ سْبَابُه الحُگرَة .

علي مفتاح