بكل حب وفخر ورقص أستقبلت مصر الشاب الجذاب الكذاب أوباما. بعد اعلان حالة الطوارىء وتعطيل المصالح والامتحانات وكتم الانفاس .. ولمزيد من الطحن للشعب اللى ساكن فى بلده بعقد مؤقت  تم وضع الالاف من الحراسة المدججة بالاسلحة  على جانبى الطريق وفوق الكبارى والميادين والحمامات. وذلك تحسبا لآى حركة نص كم تفسد الفرحة... وبعد انتهاء الزيارة التى تخللها رحلات وفسح وغداء وعشاء وحفلات ومزز حلوة للترويح عن الضيف عرفنا انه تم صرف اكثر من 500مليون جنيه .. وطبعا قبل الزيارة  كان فيه تصليحات ودهانات وتزويق وكهارب وزينات والذى منه  - بس اللى مخلينى حزينة  ازاى نصرف مبلغ زى ده على ضيف واحد  وعندنا اكثر من 8مليون مدمن  ياعينى مش لاقيين ثمن شمة هيروين ولاحقنه ماكس ؟ حقيقى حرام

- واستكمالا لمسلسل الكرم من أم الدنيا الى ضيوفها أصبحنا قطع غيار للسائحين من جميع الدول  يعنى الضيف يدخل  بلدنا وهو يعانى من فشل كلوى او كبدى او حتى عقلى بيكون ضامن أنه هيجد مايسره وكله بثمنه ....

- لكن فى ناس عندها وطنية وبتسرق اعضائنا علشان تبيعها لرجال الاعمال والاغنياء المصريين فقط وحصريا وأى حد تانى غريب لاممكن ابداااااا

- خلاص أصبحت حاسة ان مصر مش أمى  لا دى مرات أبويا  بتعامل فيها وكأنى من المطاريد وماليش  أى حق فيها.

- ولاعزاء للفقراء والعطلانيين وسكان المقابر والعشوائيات وتحت الكوبرى.والمحبوسين ظلم.

وبمناسبة أنى اكملت حوالى سنه تدوين  بشكر كل من تحمل فضفضتى وتعليقاتى .

- وبحييكم من عند جثث صخرة الدويقة ومنكوبى العبارة السلام 98 واللى راح ضحيتها 1400ببلاش . و2مليون طفل شارع منهم نص مليون اتخطفوا خارج البلاد كقطع غيار بدل تالف - والباقى أنضم أسفا لتشكيل عصابى

 - والسؤال الان  ياترى ممكن ييجى يوم وأشعر ان البيت بيتى ؟؟ ياترى بلدى هتحبنى وتحافظ على أدميتى وحريتى؟

               أستر يارب