أسهر اعد النجوم في كل يوم حَبه

وكل يوم عن يوم يخسوا كآم حَبه

لصوص تطول السما ولا النجوم بتموت

بطلت أ َشغل دماغي ولقيتها مش حَبه

—–

يامصر يام البدع قلبى اتعصر خمره

يـِسكر العربيد والعابد وابو العيون حمره

واشرب بنفس الكاس ولا ارتوى  فيكى

كن اللي ماسك في إيدك قابض علي جمره

———-

يامصر علي دينك لو حتي اموت مدبوح

وأبويا من قبلي وجدي اللي عاش كما نوح

وغرقت في طوفانك من أول فورة م التنور

ولاابنى كان تحت رجلي ولا روحي بعدك روح

—–

مفلس وقال بوقين قالوا البقر إبداع

ونجم قال البتاع قالوا عليه دا بتاع

وبين ده ودا  تاهت قلوب وعقول

روحت اشتري كلمتين قالوا الكلام متباع

——

جرالها إيه الدنيا ماهي حلوه زى الورد

مع كل ضحكه شقيه نضحك بها علي حد

علي نكته بايخه وسخيفة بس اللي قالها حبيب

نضحك ع اللي مش مفهوم ولا اللي فاق الحد

——-

نفسي اقول كلمتين بس الكلام هربان

حُرم علينا المعاني كما الغنج للنسوان

حُرمت عليكوا المعايش ياللي حرمتوه

والطاسه تعمر بايه لو المزاج خرمان

—–

طاهر الصوفاني