سألتنى إذ فجأة " يا ترى هو شهر 2 ده برج إيه ؟! " ..وعرفت مغذى السؤال لأن فخامتي من مواليد أوائل شهر 2.. فقولت لها (( الدلو )) .. فسكتت .. فقلت فى نفسي أخ أحسن تطلع زى خطيبة صديقى إبراهيم سماعة – اصلة دكتور- اللى يا عينى إتعقد من مجلات الابراج بسبب خطيبته لدرجة انه لما بأه يمر قدام أى كشك بتاع جرائد ممكن تجيلة أرتكاريا وتشنجات ويهذي كالمجنون بعبارات غير مفهومة .. فخطيبة عندها هوس بحكاية الابراج دي .. وبتصدق أى حاجه تتقال عنها .. فهى عندها إعتقاد مثلا أن رجالة برج الدلو اللى زى حالاتي مُقلّين فى كلامهم وعلشان كده أى واحد من بتوع برج الدلو حيتعب معاها أوي وريقه حينشف معاها لأنه مهما إتكلم حيفضل فى نظرها مُقل فى كلامه .. أنا أتذكر لما باركت لهم على الخطوبة قولت لها ( ألف مبروك ..) فردت عليا ( أنا عارفاكوا يا بتوع برج الدلو مُقلين فى كلامكم ..) وكأني المفروض على شخص ( متدلولو ) زى حالاتي أن يقول فى خطوبتها الكريمة مُعلّقة من بتوع لبيدة بن ربيعة أو الحارث بن حلزة ( وركز مع بن حلزة ده ) .. ولأني موش عارف أصلا هى عرفت برجي منين لكن أكيد صديقى قالها عليه طالما حوراتهم المسلية بأه حتكون عن الأبراج

والشاهد إنى خرجت من الحفلة وأنا بقول فى سري ( الله يكون فى عونك يا إبرهيم يا خويا كان بدري عليك.. عليك بدري ) .. ويبدو إن تأسفى على مصير صديقى لم يكن ضرب من ضروب العبث أو تهيئات واحد أسكرته حتيتين جاتوه فى الحفلة .. ففى لقاء قريب مع صديقى بدا يحكي لي عن معاناته اللى قربت تخلى شعره يبيض ليحقق بذلك حلم الراحل فؤاد المهندس من عشرات السنين إن المكنة خلاص طلعت قماش ..فخطيبته لم تكتفى فقط بهوايتها فى الابراج ولكنها تطبق ما تقرأه عليه هو شخصيا .. فلو إنها مثلا قرأت فى الصباح الباكر فى أى جرنال ( عزيزى رجل برج الحوت اليوم موعدك مع حب جديد) يكون يوم صديقى مطين وموش فايت لأن صديقى حظه الاسود خلاه برج الحوت .
تذكرت مأساة صديقى هذه مما جعلني فورا أتصل بها لأسألها بسرعة
(( ألو .. إنتى فاكرة لما سألتينى إنت برج ايه ؟! .. ))
(( أه فاكره )) ..
(( إنتى بتؤمني بحكاية الابراج دي ..))
(( لأ .. أنا بس سألت من باب العلم بالشىء ))
(( طيب كويس))
(( بس ليه السؤال؟! ))
(( حقولك ... اصل أنا لى صديق اسمه ابراهيم ...... الخ ))
وبعد أن أنهيت المكالمة سجدت لله شكرا ولا سجدة المنتخب المصري بعد ما دخلّوا جونهم التاريخي فى مرمى إيطاليا ، فبعد ما كنت متخيل نفسي فى مكان إيراهيم رجعت أشعر بالنشوة وإرتياح الصدر
زمان أنا كنت متخيل إن محدش بيعتقد فى حكاية الأبراج دي وإن الناس بتقرأها للتسلية ليس إلا .. لكن للأسف وجدت إن ناس كتيرة بتعتقد فى الابراج إعتقاد جامد جدا .. وممكن إنها مثلا توقف حياتها على الكلام اللى بتقوله الابراج ..ومن السخريات المبكيات إنى قرأت زمان لأحد الأشخاص اللى كانوا قائمين على باب ( حظ اليوم ) فى إحدى الجرائد إنه كان كل يوم بيعمل شقلبة للكلام اللى بيكتبه.. يعنى النهاردة كتب فى حظك اليوم عن برج الجوزاء كذا، بكرة ينقله لبرج الحوت وينقل اللى كتبه عن الحوت للأسد وهكذا .. والناس بتقرأ وبتصدق ومحدش ملاحظ أى حاجه .. والعملية كلها ماشية بإستغفال الناس ..حتى الناس بتوع الاعلام اللى مفروض أنهم يكونوا منبر نور للناس البسطاء أصبحوا بيساعدوا على تضلليهم .. فتلاقى المذيع  ( عمرو أديب ) فى بداية كل سنة ميلادية جايب الدجال المسمى (بالالوسى ) علشان يقوله السنة الجديدة حيحصل فيها إيه عن طريق الابراج والنجوم ..

والحكاية أصلا موش جديدة فخرافة الابراج عرفها الاشوريين وغيرهم من أمم الجهل لكن دلوقت الجهل بيتحط له نظريات على شاكلة قانون ابو جهل الاول وقانون ابو جهل الثاني ولو أنكرت على حد من المقتنعين بالحبشتكنات دي حيقولك حاسب يا عم دى ( علوم) وإن موش عارف ايه ماشى بمتوالية هندسية وايه ماشى بمتوالية حسابية .. وكله كذب ودجل لأننا فى زمن اصبحت فيه الخرافة بتلبس ثوب النظريات العلمية وينساق وراها السذج ..
إن مجرة (الأندروميدا) ودى أقرب مجرة للمجرة بتاعتنا دى بتبعد عنا 2 مليون وربع من السنوات الضوئية إزاى إن نجم مثلا فى المجرة دى يأثر على مصير إنسان ؟! ..إن الاعتقاد فى الحاجات دي موش بس خلل فى العقل وهرتلة فكرية ولكنه كمان خلل فى الايمان ..
فالاسلام يوضح للكل إن الغيب بيد الله وحدة فى كتير من الأيات فى القرأن الكريم والرسول -عليه الصلاة السلام- يحذر( من أتى عرافاً فسأله عن شيء فصدقه لم تقبل له صلاة أربعين يوماً ) .. عارفين بجد إن الانسان لما يعتقد صدقا فى ده ان الغيب بس بيد الله حيرتاح نفسيا ..هى ليه مثلا خطيبة صديقى مطينة عيشته ؟! علشان عايزة تعرف الغيب وبتجري وراه وبتضرب بيه الواقع .. وعلى فكرة ده حال كل المنجمين والدجالين واللى بيصدقوهم كمان ..

تخيل إن الدجال اليهودي (نوستراداموس) واسمه الحقيقي ( ميشيل نوتردام) كتبه فى الدجل زادت بعد حادثة برجين التجارة اللى كانوا فى أمريكا وده بسبب نبوءة له عن سقوط البرجين منذ ألاف السنين ثم ظهرت الخدعة إن البنوءة دي مقلهاش خالص الدجال( نوستراداموس) ولم تكن فى كتابه باللفظ اللى اتنشرت بيه ولكن اللى إستغفل الناس جمّع جمل من هنا ومن
هناك من كتب الدجال ده علشان يعمل عبارة توحي انها دلالة على حادث البرجين .. والناس تصدق وتروح تشتري والفلوس تشتغل على ناشر الكتاب ..
المشكلة الكبري إن فيه بعض الناس بتصدق كلام الابراج وبتعيّش نفسها فى الوهم ده وغالب كلام الدجالين على فكرة بيكون كلام عام وغير محدد ، يعنى تلاقى فى الجرنال برجك النهاردة بيقولك
 ( حتحصل لك حاجه حلوة .. أو حاجه وحشة .. ) ودي فعلا حاجات بتحصل كتير فى حياة الانسان فى اليوم الواحد حاجه طبيعية يعنى موش اختراع .. فتلاقى أى واحد ساذج يقولك أه صحيح تصدق كلام الابراج بيحصل رغم أنه فى الواقع كلام عايم .. ومن أمثلة كلام الابراج العايم ( أنت محتاج تقعد مع نفسك وتفكر فى الموضوع بهدوء شوية ) ..ومين فينا كل يوم معندهوش مشكلة او حاجه محتاج إنه يفكر فيها ؟! .. فالكلام العايم ده بيخلى ناس تعتقد ان كلامهم صحيح ولو كان كلامهم صحيح كانوا يحددوا ايه هى الحاجه دي .. وغالبا كل الدجالين كده موش بيحددوا حاجه وبيعمموا الامور علشان السذج يصدقوا ومينكشفش كذبهم على الناس .

وأنا عايز أقول حاجه إنه بشكل عام لازم يكون إيماننا بربنا أقوي واكبر من اى دجل حتى ولو تصادف وحصل .. يعنى مثلا تلاقى واحد يقولك ايه ده (نوستراداموس) أصاب فى نبوءة وده علشان يشكك فى إعتقادك لكن فى الواقع انت لو بحثت حتلاقى (نوستراداموس) أو غيره لو أصاب فى واحدة فهو بيخطأ فى عشرين لأن ده شأن الدجل .. وايه اللى يفرق مثلا بين (نوستراداموس) الدجال وبين (بن صياد) اللى مارس الدجل بإتصاله بالجن فقال له الرسول -عليه الصلاة والسلام – ( إخسأ فلن تعدو قدرك ) يعنى طلعت ولا نزلت دجال كلامك فشنك .. أنا أتمنى إن الناس تقابل كلام الدجالين والدجل من أبراج وحظك اليوم بهذا القول النبوي ( إخسأ فلن تعدو قدرك ) .

(كيـــــمو)