ما هو التفسير السيكولوجي السليم لرفع كثير من أصحاب محلات الفراخ شعار " الدفاع حتى أخر فرخه " ..وما هو التفسير المهيسي السليم لتهريب بعض أصحاب مزارع لا مؤاخذة الخنازير إلى وادى النطرون والمناطق اللى مفيهاش صرّيخ بن يومين ..؟!، بل وصل الأمر لحكايات غريبة جدا ولأن شر البلية ما يُضحك إسمحلي أن أقص على مسامع فخامتك هذه الحكاية .. شوف يا سيدي .. حكومتنا الجميلة أخذت قرار إنها خلاص حتغلق كل محلات الفراخ ..ورغم انى موش بحب أتشفى فى حد ولا أفرح بمصائب خلق الله بس موش عارف ليه قولت أحسن .. أصل بتوع الفراخ دول فى الايام اللى فاتت إستغلوا الناس أخر إستغلال .. حتى إن سعر فرخة بتعاني من أنيميا حادة وصل لـ 30 جنيه مع إن سعر الفرخة بيطلع من المزرعة بأقل من ده بكثير .. وكل واحد بأه إيه يزود بمزاجه ويستغلوا الناس بعد لما اصبحت الفراخ هى أخر جنس اللحوم اللى ممكن ياكلوه بعد أسعار اللحوم الحمراء اللى قربت تخرم السماء ..

ولأن ربك موش بيفوت ولا بيرضى بالاستغلال جت حكاية إنفلونزا الطيور تطفو على السطح من تاني  وجاء قرار الحكومة بغلق كل محلات الفراخ .. والحكاية يا سيدى اللى عايز احكيهالك إن الحكومة بعتت ناس لأحد المحلات بتاعة الفراخ لإغلاقها فإذا بصاحب المحل يتصدى لهم مدافعا عن اخر فرخة ومسك خرطوم أنبوبة البوتجاز ووجها لهم ومستعد انه يشعل النار فيه وفى المحل وفيهم .. طيب ياسيدى يهديك يرضيك .. ابدا .. وفى الواقع المواطن المصري لا يهمه انفلونزا الطيور ولا أنفلونزا الحنازير ولا بتاع ..هو بس بيهمه لقمة عيشة حتى ولو حيموت فيها .. شوف مثلا العيال اللى بتهاجر على مراكب الهجرة غير الشرعية واللى المراكب بترميهم فى عرض البحر وعووووووم يا ابو العربي لشواطىء أتينا وفى الاخر بيطلعوهم جثث حتى الناجين منهم قالوا حنكرر التجربة تاني .. هو عنده لقمة العيش أهم من حياته  .. فما قيمة الحياة بدون شغل ومرتب يحفظ للأنسان كرامته ؟!  وعلشان كده المصري بيخش بقلب جامد مطبقا نظرية الاجداد ( هي موته ولا أكتر ) .. ولو طبقنا المفهوم ده على حكاية أنفلونزا الطيور لإستطعنا إننا نفهم ليه الراجل بتاع الفراخ ده كان حيفتح النار ويحرق نفسه والناس والمحل فى سبيل اخر فرخة ..

فرغم ان الناس دى كونت خميرة حلوة من الفراخ إلا ان الكتير منهم عليهم ديون وفيهم اللى فلوسه فى السوق فلما يتقفل محله هو وعيلته حيتشردوا .. وإنسى بأه إنك تفهمه ان نزل السوق فيرس جديد اسمه أنفلونزا الطيور ولا بتاع ولا صحة الشعب ولا الكلام من ده .. ولو حاولت حيرد عليك ويقولك شعب مين ما احنا كده كده حنموت وتعددت الاسباب والموت واحد ومن لم يمت بأنفلونزا الطيور مات من الجوع والذل والقهر .. فرغم إنى مع الحكومة فى موقفها من إغلاق المحلات دي لكن كان يجب عليها أنها تعوض الناس عن خسارتها ولو حس صاحب محل الفراخ ان حيكون فيه تعويض عن الخسارة دى لتسابق الناس إلى اغلاق محلاتهم .

أما إنفلونزا لا مؤاخذة الخنازير فهى اخطر من أنفلونزا الطيور وبالتالى التعامل معاها لازم يكون بطريقة أشد .. وفعلا بدات الحكومة أنها تدبح كل الخنازير وحنسمعها خلاص سلام أودعك ..لكن بعض اللى بيكتبوا فى الصحف موش عاجبهم الوضع ده طب ليه يا عم الحج ؟! يقولك اصلهم مسجلوش ولا حالة أصابة .. طب هو يعنى المفرض نستنى ؟! .. ولما نسجل حالة أصابة ماذا يفيد البكاء على اللبن المسكوب ؟! ..بعدين احنا نقول مثلا استنى لو حنعمل ابادة لبقر ولا جاموس لكن لا مؤاخذة الخنازير دي مين بياكلها فى مصر ؟! ولا ايه هى لزمتها اساسا ؟!  والامبا شنودة قال انها موش حيوان مقدس عندهم .. طب اشطة الكلام ادبح يا عم الحج إنت مستنى ايه .. وهى اصلا حياة الناس لعبة .. وحتى لو هى حيوان مقدس فحياة الناس أهم حتى لو كان المصاب خرفان .. وطبعا لأنه موسم الخنازير أقصد موسم الكتابة عن أنفلونزا الخنازير لازم نلاقى طبعا ناس ضربة دبوس خنزير وطالعة تهيس فى الجرايد .. واحدة كاتبة  انه "بلاش نقتل الخنازير  وان ربنا موش حرمها علشان هى وحشة ولكن علشان هى مهمتها أسمى من ان هى تدبح" ..

طبعا كلام لا يُقال اصلا لعيال فى حضانه ويكفى انك تكتب فى محرك البحث جوجل "أضرار لحم الخنزير" وشوف البلاوي السودة لأضراره المهببة وبعدين فى مواسم العك واللت والعجن لازم حتلاقى ناس بتهيس وليس على المهيس حرج طالما هو عارف انه مهيس .. ده عن الناس اللى واخدة موسم  أنفلونزا الخنازير وسيلة للت والعجن وكل واحد عمال يفتكس وكل واحد برأي .. أما عن الناس اللى حتستغل الموسم ده علشان تعملها قرشين حلوين فهم قعدين مستنيين وإشطة الكلام .. وبدأ الكلام عن أحد رجال الاعمال بدأ يشتري من بلاد بره الاقنعة الواقية زى اللى كان لابسنها بتوع المكسيك.. ولأن الشعب المصري لازم يلبس فهو ملبوس ملبوس يا ولدي بدأ رجل الاعمال يشتري الاقنعة دي علشان وقت اللزوم يعملوا إشاعة حلوة كده فالكل يجري ويشتري وطبعا هو يهبر وموش بعيد يكون له دلال على أحد من صُنّاع القرار يطلعه قانون إن اللى موش حيلبس القناع ده حيتخوزق زى سليمان الحلبي اللى يرحمه أو يّدبح مع الخنازير بتهمه انه عطسسسس مع سبق الاصرار والترصد .

(كيـــــمو)