محتويات الإدراج الذي تريد إرساله:
رسالة فوق العادة من قارئة
...
رسالة فوق العادة من قارئة
(( وصلتني الرسالة التالية إلى بريدي الالكتروني ..فيها تكبير لراسي ..ونفش إلي ليوم النفش ..بس فيها تحميل للمسؤولية أكثر مما أحتمل أو أطيق ..لغة الرسالة تحاول الاختراق من البلاغة الفصيحة إلى البلاغة المحكية ..إليكم الرسالة التي أمتنع عن ذكر اسم صاحبتها كرامةً لها وحفاظاً على حقها ..بيكفي إني أنا عارف الاسم وشو ما بدكو تحكوا إحكوا ..!!! كامل النصيرات ))
بسم الله الرحمن الرحيم
أمسيت بأنوار النبي ...
دعك من الاعتراف بأنك في وضعٍ صعب ... حتى و إن كنتَ ... فأنت تزيد نفسك حزناً دون أن تدري ... لا بد و شعورك بالمسؤولية تجاه ما تواجه ... و لكن لا بد من حل ... و لا بد لذلك الحل أن يأتي .. عاجلاً أم آجلاً ... أم أنك تظن أنك من سيخرجك مما أنت فيه ؟؟ دع القدَر يأتيك بالحل ... لا أقصد أن تجلس مكتوف اليدين ... إنما انظر لما حولك و رَ أن الحل ليس ببعيد ... فالقدَر تجره الأيام و أيامك ليست كلها صعبة ... فاستغل ما بهذي الأيام من حقائق ترسمها طريقاً نحو الحل ... و الناس مش كلها متل بعض ... يعني سبب هالمشكلة أكيد مش رح يتأبّد ... و لو كان في مشكلجيين بالدنيا فالعالم المنيحة أكتر ...
يعني و الله لَمّنْ بقرأ مقالاتك ... ( و أكيد كل العالم يلّي بيقرؤوها متلي و الردود عليها أكبر دليل ) ... بحس عنجد بإنك بتفرِّغ غضبنا كلنا ( باسمك واحد منا ينطق باسمنا ) ... و كنت فعلاً لمّنْ بقرأ مقالاتك ( الهادفة منها ) أجدك ترى حلاً أو تقترحه ... و على الأغلب تسلم للمسؤولين بأنهم قادرون و لكنهم لا يفعلون ... هُوْ صحيح بحس أمرار إنك بتظلمهم ! لأنك ما بتحكي و لا حسنة لِـلّي بتنتقدهم ! و بتجردهم من كل منيح ! و بتخلينا نضحك فوقها كمان يعني بكون الواحد عنجد ما بين دموع و ضحك ... بس بتعرف ؟ و الله هالحكي بريّحنا نحنا القارئين ... ليه بحسك حامل هموم الدنيا و ماشي.. أنا نفسي أفهم ... يعني ما بتخفف كتاباتك شي من الألم ؟؟ و الاّ ما بتضحك لمن بتكتبلنا ؟؟ هو صحيح ... كتاباتك لإلنا و الا للمسؤولين ؟؟
على كلٍّ.. لو لمين ما كانت و لو شو ما هدفت بتبقى فشة غل ... يعني بتريح ... و هادا يلي أنا شفته لفترة مش قليلة بكتاباتك ... و يلي عم بستعجبه إنك تعبان من أكَمْ مشكلة بيعتبروا هينين بالنسبة لسوابقهم يلّي كنا نحنا نبكي و انت تضحكنا و تخفف عنا و تبهدل يلي بكانا ... بس هلأ نحنا عم نشوفك عم تحزن علينا لمّنْ نبكي ... و ما عدت تواسينا ... و لو إنك بتبهدل سبب مشكلتنا ... بس .................. إنت متلنا تعبان !! و نحنا كنا لمّنْ نتعب نتفرج عليك لتورجينا شي يهدّي علينا و هلأ لمّنْ بنطلع عليك صرنا لو عم ندمع بنصير نبكي ، و لو ما عم نحس نصير ندمع ... شو يلي صار ؟؟
حزنك و الله مش عم يأثر عليك لوحدك ... عم يأثر على كل واحد كنت تواسيه قبل هيك ... و هادا الفرق بينك و بين أي واحد فينا ... فلو حزنت ما بحقلك تعترفلنا ... لأنك أملنا الوحيد و حزنك بمثابة يأس متل ما قلتلك قبل هيك ... و طبعاً ما بهون عليك تخلينا نحس باليأس ! لأنا و نحنا متفائلين مو عاملين شي كيف لو إنا يأسانين ؟؟ رحنا فيها !
فما تكون أحد منابع أنهار دموع هالعرب ... خليك مصب لإلها أو شجرة بتشرب منها لتكبر و تعلمنا العطاء ... على علمي إنو قارئ مقالاتك يرى الواقع المر فبحاول يغيره بعد استفزازك ... مو بيقعد يبكي على حاله ...
و أنا أول وحدة بحكي بإنو وضعك يلّي أنا متصورته صعب ... لأنك بشر متلنا و من حقك تزعل و من الفطرة إنك تحزن و ما عاد تقدر تتصبّر على المشاكل ... بس يلي بعقد الأمور إنك صرت أحد العالم الأقلة يلي بينبنى عليهم أمل بالحل ... فما ترجعلنا ملوحة الخدود ... بدنا نصحى ما بدنا نحلم ...
بتعرف متى زلزلني حزنك ؟؟
وقت ما كتبت بإحدى مقالاتك ... ( يا جماعة أنا تعبان ) ... يا الله شو استغربت استخدامك لهالكلمة !! لأنك مش إنت يلي بيحكي هيك حكي ... بس بتبقى متلنا بشر بيتعب متلنا ... بس و الله إعترافك أكيد لزمو هدّ جبال لصار !!
و بالعربي : إنت بنظر بعض العرب ممن ينطبق عليهم قول ( لكل من اسمه نصيب ) ... فلا تخيب أملهم ..ما تحكيلي إني عم بجاملك ... بس هاي أنا لمّنْ بكون مباشرة ... فظيعة صح ؟؟
أنا بعرف إنو رسالتي زادت الطين بله
بس من القلب
دمت بخير
...
|
