دايماً فاكر إنك صح
و على طول كل الناس غلطانة

اسمح لي يا صديقي أقولك
إن عينيك فعلا تعبانة

دايماً شايفة عيوب الناس
دايمًا مستنية الغلطة

لكن في عيوبك ما تشوفش
و دي يا حبيبي أكبر غلطة

ده العين اللي يحبها ربك
هي العين اللي بتستر

ربك أصله رحيم و كريم
و لكل خطايانا بيغفر

حاول تلبس نظارة
تخفي عيوب الناس على طول

و تكون لعيوبهم ستارة
و لعيوبك تكشف و تقول

عن نفسك انت المسئول
و ما انتش مسئول عن غيرك

حاسب نفسك كده على طول
و نظف قلبك و ضميرك

خليك دايماً كده مشغول
بعيوبك كتر خيرك

صلح نفسك و اهديها
تلقى الدنيا بقت جنة

و عيوبك فكر فيها
و ادعي لربك و اتمنى

الكلمات الإلهية
هي الحل لكل مشاكلك


لو تبعد عنها شوية
الأحقاد و الغيرة هتاكلك

قرب من ربك و إدعي له
و خللي هدفك هو رضاه

تلقى الدنيا بتتغير
و حياتك تبقى أحلى حياة