ضيفتنا اليوم
شاعرة العامية الجميلة / فاطمة عطيه
صاحبة مدونة النفس المطمئنة
*******************
الى روح الحبيبة
رغم إنك .. رغم إني
رغم سني .. رغم ابني
والحفيد واخداه في حضني
رغم هم سنين عجاف
رغم خط الشيب في شعري
رغم إن الضهر محني
واللي حوالينا آلاف .. والمشاغل والمشاكل
والحياة زي الطاحونة.. دايرة تطحن ذكريات
رغم دايرة من الآلام والإحباطات
رغم ملايين الحاجات
رغم إنك يا حبيبة رحلتي عني
ورغم إني محتاجة لك جنب مني
ورغم إنك في العلالي.. ع الأرائك جوة جنة
لابسة توب أبيض حريري .. والأساور فضة لامعة
رغم إنك عند ربي من سنين
رغم إني .. إلا إني
كل ليلة باحط راسي ع المخدة
ألقى كفك فوق جبيني
ألقى صورتك مالية عيني
قعدتك.. صوتك .. عبيرك
حتى أنفاسك يا غالية .. دافية حضناني تداديني
لهفتك لو قلت آه .. قلبك المليان حياة
لسة يا امه صدقيني.. لسة وببصة عنيكي بتأمريني
وتلاقيني باطيع أوامرك
لسة جوايا المرارة لو خالفتك
لسة فاكرة ازاي بعقلك وببساطتك
قادرة على فهم الأمور
ماسكة دفة السفينة بكل قوة
كالجبل قدام عواصف .. واحنا كالنمل اللي خايف
للأسف .. مافينا منك غير ملامح
لسة يا امه بتسأليني .. تحلفيني .. وتقولي لي أوعديني
أوعي بحر الهم ياخدك
صحتك .. تاجك وكنزك
خلي كل الناس حبايبك
أوعي غل الحقد ياخدك
صفي قلبك كل ليلة واغسليه
وانوي دايما كل خير .. خلي ربك بين عنيكي
حاسبي يوم تذلي نفسك .. أو تمدي لحد يدك
لقمة بالبركة تشبع .. حتى لوبطنك بتعوي
داري شمعك.. واحكي لو بالكدب عزك
باهي كل الناس بعملك .. مش باهلك
خليييييييييييي.... بس يا امه خلاص فهمت
كل وصاياك العظيمة ..بالحروف النورانية
جوة قلبي وجوة عقلي نقش ثابت
مش حتمحيه السنين.. مش حتخفيه الآلام
بس وف آخر الكلام .. أسمحي لي ألوم عليكي
أيوة يا أمه ألوم عليكي
ليه غرستي الطيبة فينا والسماحة؟..والصراحة
وكلمة الحق اللي تسبق .. والقلوب اللي بتعشق
كل مافي الكون بقوة
والشجاعة والمروءة والأصالة
كل دي بضاعة وبارت.. شونوها في المخازن
قالوا عنها مخلفات .. بالكتير حتكون آثار أومخطوطات
واللي باقي أقول يا بختك يا حبيبتي
انتي عشتي ف عصر طاهر
أما إحنا بكل حســــــــــــــرة.. تهنا في عصر المظاهر
