عبد المنعم ..حر .. حبيس

بالصدفة البحته وأنا بدور في موقع يوتيوب الشهير .. علي فيديو احمله عشان أجرب برنامج التحميل .. لقيت الفيديو ده ..!

أي حد مننا كان هايتعامل عادي .. كان هايشوف الفيديو بيتحمل ولا لأ وبعدين يقفل الصفحة ويخرج ..

لكن للحظ أنا معملتش ده .. مش عارفه ده بقي من حظي الكويس ولا من حظي التعيس ..

منعم أنت راجل أوي

أنا معرفش مين منعم ومعرفش ايه حكايته ..! والكارثه انه مصري وكان معتقل وافرج عنه حسب رواية من وضع الفيديو ..! لكن اكيد في الف منعم تانين جوا ..

أنا مش خجلانه اقول إني جاهلة بقصته .. لأني لو خجلت ابقي بداري علي خطئي ..

سواء كان منعم حر دلوقتي او محبوس .. فهو دفع ايام من عمره خلف اسوار الاعتقال ... عشان حاجة مش عارفه هي مهمة ولا لأ ..!

عشان كلنا نبقي أحرار ..

حد فيكم هايجي ويقولي ايه الكلام الفارغ ده .. يعني ايه احرار محنا احرار اهوه .. هأكد علي كلامه واقوله بالفعل ده كلام فارغ .. لأنه ميعنيش اي حاجة قدام اللي عمله منعم ..

جايز يكون ربنا خلقنا أحرار .. من العبودية .. لكننا شعب مريض .. بالحاجة ..

عملنا من نفسنا عبيد ونصبنا عبد تاني علينا ..

وفي النهاية .. عشنا وموتنا ..

واحنا كل همنا .. ندور علي فيديو يوتيوب نحمله من علي موقع ..

منعم .. أنا اسفة ليك أوي ولكل اللي زيك ..

وبقولهالك اهو .. لحد وقت قريب كنت بسمع المثل اللي بيقول ( الرجالة ماتوا في 73 )

هاقول لأ .. في لسه رجاله عايشه .. بس للأسف أرواحنا هي اللي ماتت ..!