[ الفصل الأول]

(المشهد الأول)

- المكان: فيلا مراد

- الديكور: سجادة حمراء كبيرة تتوسط الصالة، سلم يفضي إلى الدور العلوي، صالون ذهبي على اليسار، وعلى الجدار الأيسر صورة كبيرة لمراد، باب الفيلا في الواجهة على بعد مترين من السلم وهناك باب جانبي في اليمين وباب في اليسار إلى جانب جهاز كمبيوتر على منضده وبجواره جهاز غريب الشكل.

((يدخل جودة إلى خشبة المسرح ممسكا بزعافة تنظيف صغيرة ومقشة وهو يرتدي جلبابا لبني اللون ويبدو منهمكا في العمل))

جودة: (يغني) هز الهلال يا سيد .....كراماتك لجل نعيد.....يكفى اللي حصل....كان يوم ووصل ...بقى زرع بصل....هديت واهو راق الحال ....ورجعنا للأشغال.......(يتوقف عن الغناء فجأة وينظر إلى الأمام) حال!!! حال ايه اللي راق......والله يا ولاد صحيح كلام أغاني....دانا بقالي من ساعة ما ربنا خلقني واناحالي لا يسر لا عدو ولا حبيب ...... ومبقلش غير الحمد لله.....الحمد ليك انت بس يارب مش لحد غيرك....يعني هيا أخرتي ايه سواء اني ولا البيه اللي اني شغال عنده.......هيا حتة ارض مترين ف متر.....وجايز اني اخش الجنة وهوا يروح النار.....اني بقى أتمتع بالأكل والشرب والنساوين الحلوة.....وهوا بقى يتعذب على سرمحته مع النسوان اللي بيجري وراهم.....اني عارف هما بيحبوه على ايه......(يتجه إلى صورة مراد الوسيم ويكلمها ) نفسي أعرف إنت احلى مني ف ايه ولا تزيد عني ايه .....غير انك غني وعندك شهادة وعربية وقال كماااااااااااان بتخترع........قال بيخترع قال.....ده طول الليل قاعد على اللي اسمه ايه ده البنكبوتر يكلم دي ويحدت دي .......ولما ميقعدش عليه يروح يتسرمح مع صاحباته ......ولحد دلوقتي لسه متلمش.....ملقاش الست اللي تلمه .......وهوا نفسه مش هيتلم

((جرس الهاتف يرن فيتوقف جودة عن الحديث ويذهب إليه متثاقلا ويرفع السماعة))

جودة: سلامو عليكو......مين.....أهلاااااااااان يا داكتور ....ازيك يا داكتور رائف ......فينك وفين قعداتك الحلوة ......تسلم يا داكتور ......بخير الحمد لله......تسلم .....تسلم.....الداكتور مراد.....الداكتور مراد لسه نايم......وهوا منبهني قالي يا جودة متصحنيش غير الساعة تسعة ونص وهيا لسه مجتش تسعة وربع ....بيقول انه عايز ياخد دش ويجهز قبل التجربة.....الا ايه حكاية التجربة دي يا داكتور.....حاضر ....هاقله ......ماشي ..... حاضر.....يوصل سعادتك......مع السلامة.

((جودة يغلق الهاتف ويتجه إلى أمام المسرح بخطوته المتثاقلة))

جودة: (ينظر إلى أعلى وكأنه يتذكر) هوا قالي اقله ايه؟....قال حاجة صعبة كده....مش فاكر....يعني اني مخي دفتر.....هيه نسيت....يلا((يتجه إلى المقشة ليكمل عمله فيرن جرس الباب))

جودة:: يييه...... دي باينه يوم مش فايت النهارده ......حاضر .......جاي .....

((يندفع إلى المسرح فتحي وهو شخص يبدو عصبيا وحادا))

فتحي: (يتحدث إلى جودة) سيدك لسه مصحيش

جودة: طيب قول سلامو عليكو يا داكتور في الأول......

فتحي: وايه الفايدة؟ قلتلك سلامو عليكو....هتقلي وعليكوا السلام .....انت هتلعب معايا .....انا اقول كلمتين وانت تقلبهم ....ونضيع وقت ملوش لزمة.....

جودة: يا داكتور استغفر ربنا ....ده سلامه اللي أمرنا بيه ...دهدي

فتحي: يلا....يلا...بلاش تضييع وقت...إطلع صحي سيدك عشان التجربة معادها قرب

جودة: إلا عدم اللامؤاخذة يا داكتور ايه التجربة دي؟

فتحي: يا سلام يا خويا.....مبقاش فاضل في الدنيا غيرك عشان يتكلم في العلم ويسأل عن التجارب العلمية العبقرية اللي أنا مع الدكتور مراد قضينا وقت طويل عشان نشتغل فيها.....إنت مالك أصلا بحاجة زي دي.

جودة: يا دكتور ده ربنا قال ((علم الإنسان ما لم يعلم)) ومش هيحصل حاجة لما تنورني...ولا ايه؟

فتحي: طيب شوف يا جودة....أنا هارتكب اكبر جريمة في العالم....جريمة هيحاسبني عليها التاريخ....جريمة هتتوقف قدامها جرايم هتلر وموسوليني وجنكيز خان وحتى جرايم آرييل شارون وتعملها تعظيم سلام.

جودة: (يقترب منه في قلق وخوف) جريمة ايه دي يا ساتر يارب؟

فتحي: (يضع كفه على ظهر جودة) جريمة اني هافهمك.....

جودة: يعني يا داكتور هوا لما تفهمني دي تبقى جريمة ..... ليه.... هوا اني ممكن أضر العالم لو فهمت؟

فتحي: إنت أحقر من إنك تضر دبانة على وشك....بس لما عبقري زيي يقف قدام حيوان زيك ويفهمك أكيد يبقى بيضيع وقته ودي جريمة في حد ذاتها.....

جودة: طب قول يا داكتور وربنا يسامحك.

فتحي: (يقترب من جودة وكأنه يقول سرا خطيرا) تسمع عن الشاتنج؟

جودة: إيه الجاكت ده؟؟؟.....مش ده اللي احنا بنلبسه برضه في البرد؟

فتحي: الشاتنج يا بني آدم......قعدات الكلام اللي على النت.....لما واحد يكلم واحد على النت.

جودة: إيوة إيوة.....باشوف سي الداكتور مراد بيعملها وكلهم مع النساوين...

فتحي: لأ يا اخويا ..... إحنا بنكلم ستات ورجاله ...... بعدين إيه نساوين دي......دول كلهم ناس افاضل واحنا عاملبن جروب ع النت........

جودة: عاملين جرون ع النت ازاي يعني

فتحي: جروب ....جروب يا متخلف .....يعني مجموعة وكلهم ناس أفاضل ومحترمين.....هما صحيح متنييلين وحالتهم بالبلا......إنما محترمين......فيهم اللي بيكدب واللي شايف نفسه.....إنما محترمين.....فيهم اللي بيخش عشان يعلق واحدة وفيهم اللي بتخش عشان تعلق واحد.......إنما محترمين......فيه اللي بيغش واللي بيسرق واللي عامل انه بيحبك وهوا نفسه يقتلك.......انما محترمين برضه.

جودة: (لنفسه) والله ما دام ده رأي واحد زيك يبقى أنا اتأكدت انهم فعلا محترمين

فتحي: إنت بتبرطم بتقول ايه؟؟

جودة: بقول عندك حق يا داكتور.... فعلا...بس ايه دخل الحاجات دي بالتجربة بتاعتكم ؟

فتحي: شوف يا جودة.....إحنا بنتبادل الكلام عن طريق الكتابة واحيانا بالسماعات وأحيانا بيبقى عند ناس مننا كاميرا ويب تقدر تشوف بيها الناس اللي بتكلمك .... انما متقدرش تلمسهم ....متقدرش تشوفهم على طبيعتهم .....متقدرش تتكلم معاهم فاس تو فاس.

جودة: هاه

فتحي: (بعصبية) وجها لوجه يعني.....وشك قدام وشه ......خلقته في خلقتك...........(يصرخ) فهمت يا حيوان

جودة: إيوه يا داكتور ..... فهمت..

فتحي: أنا بقى وسيدك عملنا جهاز تربطه بدماغك وتنام......أول ما تنام نتقابل احنا كلنا في عالم افتراضي وكله يشوف التاني من غير ما يشوفه.....ويسمعه من غير ما يسمعه.....ويحس بيه من غير ما يكون حاسس بيه.

جودة: ايه اللي بتقوله ده يا داكتور؟ انت هتخرف ولا ايه؟ يعني ايه يشوفه من غير ما يكون شايفه هوا مش شايفه أساسا ولا ايه بعدين يعني ايه عالم ....اااا.....عالم ااااااا.....إنت قلت ايه يا داكتور.....

فتحي: أخرف!!!!إنت بتقلي أنا يا حيوان أخرف..... عالم افتراضي يا حيوان....يعني احنا اللي فارضينه.....مش تعرف برضه يعني ايه الفرض.....

جودة: إيوه طبعا امال ايه.....الفرض ده زي صلاة الصبح والضهر والعصر والمغرب والعشا والصوم والزكاة والشهادتين والحج إلهي ربنا ينولهالنا جميعا قادر يا كريم..........

فتحي: يا ابني لأ......مش كده.....الفرض يعني باديلك مثال .....بافترض معاك حاجة مش موجودة

جودة: لما هيا مش موجودة بتفرضها ليه اساسا

فتحي: جودة .......وقتك خلص .....يلا صحي سيدك

جودة: (مذعورا) يا سنة سوخة دي الساعة بقت عشرة الا ربع والبيه نسيت اصحيه

((يصعد جودة إلى أعلى ليوقظ سيده بينما يتحرك فتحي في الفيلا بتعالي شديد ويتوقف أمام الجهاز الجديد))

فتحي: (يكلم نفسه) إنت ....إنت وبس....إنت اللي هتخليني غني ومقتدر.....صحيح مش زي مراد اللي هيلهف خمسة وستين في المية من حقوقك.....إنما على الأقل هاقدر اعمل اللي انا عايزة.....زي مراد....أقدر آكل واشرب والبس واتمتع واحب......أحب وامشي مع الستات زيه.

((يتحرك فتحي بعيدا عن الجهاز ويقف في وسط المسرح تماما))

فتحي: (لنفسه) أمي الله يرحمها كانت دايما تقلي يا فتحي من جاور السعيد يسعد.....يا ابني شوف مين ناجح وصاحبه عشان تبقى ناجح زيه......علشان كده طول عمري ما ابصش للفاشلين ولا الأغبيا....انا دايما عيني على الناس اللي بحس انهم بيفهموا وناجحين في حياتهم......بس أنا زهقت خلاص....عايز ابقى انا ولا فيش غيري.....انا اتعقدت من مراد وغراميات مراد ونجاح مراد.....قلدته في كل حاجة.....كل حاجة قلدته فيها ولا عرفت اكون مراد......ولا قدرت ارجع فتحي تاني.......

((يتحرك فتحي بعصبية في المسرح وهو يواصل الحديث))

فتحي: حتى الجروب اللي بنكلمه على النت.....كلهم ليهم شخصيتهم وبيحبوا وعايشين ومبسوطين.....عزمي بيحب ريم وريم بتحبه.....وأزهار بتحب رامي وهوا اللي مش معبرها......ونورا البنت الطيبة الهادية دايبة لشوشتها في حب مراد ومش بس نورا....ده كمان نجوى المتجوزة كل يوم تنيم جوزها وتقعد تتبادل معاه الغرام وهوا لا معبر دي ولا دي......أما عبد الرحمن فدايب في حب نورا....وهيا مش معبراه.....و....و....وانا كمان برضه بحب واللي بحبها مش معبراني......

((يعود مرة أخرى إلى الجهاز))

فتحي: بس اللي مضايقني في دول كلهم وغايظني هوا عزمي ده.....مصاحبهم كلهم....صحيح هما كلهم عارفين انه بيحب ريم......وعارفين برضه ان ريم بتحبه......إنما مصاحبينه وبيسمعوا كلامه مع إنه حتة مهندس مدني عادي جدا ولا بيكتب شعر زي رامي ولا بيخترع زيي ولا زي مراد ولا كان بطل في حرب اكتوبر زي الدكتور رائف.......هوا صحيح مثقف جدا......إنما معندوش موهبة.......إيه يعني تكون بتحب الجمال إنما متعرفش تخلقه.

((يسمع من أعلى صراخ ضخم من مراد في وجه جودة الذي يكاد يتوسل السماح من مراد الذي يدخل إلى المسرح مرتديا الروب))

مراد: (لجودة) أنا مش قلتلك تصحيني الساعة تسعة ونص يا بني آدم عشان أخد دش واستعد للتجربة

جودة: (في توسل شديد) آسف يا بيه مش قصدي والله بس سهي عليا مش أكتر

مراد: طيب روح جهز الحمام بسرعة وطلعلي البارفان بتاعي ونهارك اسود لو الحمام اتأخر ربع ساعة كمان....فاهم يا بني آدم.

جودة: حاضر يا سعادة البيه

مراد: استنى يا جودة.....قلي.....حد اتصل بيا.

جودة: إيوة.....الداكتور رائف كلمك وانت نايم وقالي ابلغك حاجة.....إنما مش فاكرها.

مراد: طيب روح انت اعمل اللي قلتلك عليه وأنا هاكلمه دلوقتي.

((يتجه جودة للخروج من المسرح لتنفيذ أوامر مراد ويتجه فتحي نحو مراد بهدوء غريب نسبة للعصبية التي كان يتحدث بها منذ قليل))

فتحي: صباح الخير يا دكتور مراد.

مراد: إنت جيت هنا ليه؟......مش المفروض تبقى في بيتك دلوقتي عشان التجربة.

فتحي: أنا جيت أطمن على الوضع النهائي يا دكتور.

مراد: (بقلة اكتراث وتعالي) طيب......طيب.....خلاص.....استنى لما أعمل المكالمة دي وهنتكلم.

((يرفع مراد سماعة الهاتف ويطلب رقما ضخما نوعا ما وينتظر قليلا حتى يأتيه الرد))

مراد: صباح شريف يا دكتور رائف.......عامل ايه......جودة قالي انك اتصلت.....خير ان شاء الله......إممممم......إمممممم.......إممممممممم.......لأ.....حضرتك هتاخد الطوق اللي في الجهاز وتحطه على دماغك عادي وبعدين هتضغط على ستارت شاتنج...........لأ برضه......الجهاز متبرمج على الجروب بتاعنا......متقلقش من النقطة دي..........عزمي جاي ان شاء الله.......أكيد.....أيوة......برضه الأستاذ فؤاد جاي.......تؤمر بأي حاجة تانية.....بعد تلات ساعات بالضبط من دلوقتي يا دكتور من توقيت انجلترا عندك أيا كان.....ماشي........ماشي........ألف سلامة.

((مراد يضع السماعة بعنف ويرفع رأسه إلى الأمام))

مراد: (ينفخ) أووف....كله جاي عشان عزمي.......كله عايز يقعد مع عزمي....حتى أوصاف ودنيا أول حاجة سألوا عليها عزمي.

فتحي: ما هي نورا ونجوى جايين علشانك برضه ولا إيه.

مراد: (وكأنه ينتبه إلى وجود فتحي لأول مرة)) خير........حضرتك هنا بتهبب إيه.....مش المفروض تكون في بيتك عشان تجهز للتجربة وتهدي روحك شوية عشان تعرف تنطق قدام أوصاف بتاعتك اللي انت فالقنا بيها دي وهيا مديالك بالجزمة.

فتحي: جرى إيه يا مراد؟؟.......متخليك حليم......هوا أنا ارتكبت جريمة يعني عشان جيت.....أنا جاي أطمن على الوضع النهائي.

مراد: واطمنت......يلا.....مع السلامة بقى من غير مطرود ((يدفعه إلى باب المنزل)).

فتحي: (يقاوم) لسه.....أنا لحقت أتكلم معاك.....ثم انت عصبي معايا ليه.

مراد: أنا باوريك بس انت بتعمل ايه مع الناس......انت من ساعة ما جيت وانا سامعك عمال بتهزق في جودة.....فكرك انا كنت نايم......يا بابا أنا مش محتاج حد يصحيني.

فتحي: يا سلام .......ولما انت صاحي مقمتش لوحدك ليه وعفيت جودة من المحاضرة اللي اديتهاله.

مراد: وانت مالك انت يا ابو دم تقيل؟.....أنا وجودة محدش يتدخل ما بينا.....أنا علاقتي بيه مش زي علاقتي بأي حد ومتطلبش تفسير للحمقة دي على كرامته اللي أنا أحيانا بامرمط بيها البلاط.

فتحي: يعني هوا على رأي الشاعر ((أحرام على بلابله الدوح .......حلال للطير من كل جنس))

مراد: لأ يا ابو دم خفيف المرة دي حرام للطير من كل جنس....حتى في الشعر مبتعرفش تستشهد...هوا جودة ده خدامي ولا خدامك.

فتحي: لأ خدامك.

مراد: يبقى أنا عداني العيب طبقا للبيت اللي انت استشهدت بيه.

((فتحي يفكر قليلا في هذا الكلام))

مراد: (بعصبية) يا ابني إنت حمار مش هتعرف غلطتك ولا السنة الجاية.....يلا....خلصني وقول اللي إنت عايزة.

فتحي: ((يتلعثم)) بصراحة يا مراد أنا جاي علشان اااااااااااا.....علشان اااااااااااا

مراد: علشان أوصاف......مش كده؟

فتحي: أيوة.....بصراحة أنا مش باعرف اتكلم معاها خالص......باحس إنها أقوى مني.....وباحس انها مش بتحترمني إطلاقا.

مراد: ما هو بصراحة إنت لو اتجوزتها هتبقى مراتها مش هيا اللي هتبقى مراتك......أصل للأسف الشديد أمثالك يقدروا على جودة......على فراش المعمل بتاع كليتنا.......على المعيدين في القسم عندنا....إنما ميقدروش على حد تاني وخصوصا لو كانوا زي أوصاف.

فتحي: (راغبا في إثارته) يعني إنت اللي قادر على دنيا قوي.

مراد: يا ابني أنا مش زيك.....دنيا عارفة إنها لو حبتني مش هتقدر تبخ ف وشي.....وبعدين اللي بيضحك في الآخر بيضحك كتير......ثم انت ناسي إنها بتحب ابنها قوي....أنا كنت متأكد إنها يستحيل تيجي معانا من غير ابنها عشان كده جهازها كان بطوقين واحد ليها والتاني لابنها......إنما كونها تقع فيا دي مسألة وقت.

فتحي: وانت ان شاء الله هتتجوز مين....نورا ولا دنيا.....ولا هتخلي نجوى تسيب جوزها علشانك.

مراد: لو هختار حد فيهم هختار دنيا.

فتحي: واشمعنى يعني.

مراد: عشان صعبة.......مش هيا اللي بتجري ورايا.

فتحي: طيب ياريت أوصاف تمشي بس....مش تجري ورايا.

مراد: يا ابني أنا بافقد المتعة لما الاقي الست بتجري ورايا......المتعة في ان الست هيا اللي تعذبك......وتخليك تسهر الليل......وتتألم.....تتألم لدرجة إنك تستلذ الألم....يا سلام....الشعور ده ميتقدرش بتمن.....وبعدين إنت كده كويس.....أنا باحسدك على العذاب اللي إنت فيه من أوصاف.

فتحي: (بذهول) تحسدني.......دانا باتعذب في كل لحظة.

مراد: طيب ما هو ده جمال الحب يا عبيط......عارف ليه أنا مش باعبر نورا رغم انها بتحبني؟.........عايزها تتمتع.........أنا باعمل ده لمصلحتها.....طيب تصدق إني خايف إن دنيا تحبني لحسن أكرهها أو اسيبها.

فتحي: أمال انت هتتجوز ازاي على كده.

مراد: ما هو ده اللي انا مش لاقيه لغاية دلوقتي.....عايز اتجوز واحدة مبتحبنيش.....عايز واحدة بتكرهني وأنا اللي بحبها.....أنا اللي باجري وراها......بس للأسف.....صعب ألاقي حاجة زي كده.

فتحي: (بذهول أشد) طيب وهيا لما هتبقى كرهاك......ازاي تقدر تباشر معاها الحقوق الزوجية.....ازاي هتديلك نفسها وهيا مش طايقاك.

مراد: ومين قالك إني عايز حاجة من دي......أنا عايزها تتمنع لآخر درجة.......وتعذبني لآخر درجة.

فتحي: إنت مريض.

مراد: ومين فينا اللي مش مريض......كلنا مرضى.....كلنا مرضى........مفيش حد فينا سليم.....بس كلنا عايزين نعمل على بعض اننا كويسين ومثاليين لكن الحقيقة غير كده خالص....كل واحد شايل قربة مخرومة وعمالة تخر على دماغه.

(( يتجمد فتحي في مكانه تماما بينما يدخل جودة إلى المسرح))

جودة: الحمام جاهز يا بيه.

مراد: تسلم يا عم جودة.......(يلتفت إلى فتحي) مش اطمنت على الأحوال يلا مع السلامة بقى ومستنيك في التجربة النهارده.

((ينظر إليه فتحي نظرة خاوية ثم يخرج دون أن يتبادل معه أي كلمة على الإطلاق))

جودة: هوا ماله فيه ايه؟

مراد: أبدا يا جودة أصله خد مني درس صعب حبتين فبيستوعبه.

جودة: (يضحك في شماته) لأ وعمال يقول اني غبي ومتخلف.

مراد: لأ......الدرس اللي اديتهوله مش محتاج واحد ذكي.......محتاج واحد مراد.

[ستار]