طالب من الله ولا يكتر على الله انكم تقفوا معايا وتساعدونى ....تساعدونى لوجه الله تعالى ....وماحدش منكم خياله يسرح لبعيد..ويفتكر انى طالب حسنه أو فلوس ..لا سمح الله ..الحمد لله مستورة ......وكمان أنا عارف ان فيه منكم ناس لسه عايشه فى زمن الفلس والصاغ ...وان المليم مابيهونشى عليها .....ومحوشه تحت البلاطه شىء وشويات .....انا قاصدكم  فى حاجه تانيه خالص ...قاصدكم فى نصيحه...وقاصدكم تقفوا جنبى فى أزمتى ومشكلتى ...أصل أنا نويت أبيع الأرض ...الغيط يعنى ..والدوار الكبير اللى فى البلد حدانا واسافر...لأن فيه واحد ابن حلال جاب لى عقد عمل فى بلاد بره....ح يسلمونى غيط كبير أزرعه  ويبقى ملكى ..وانا متزعزع...ومش عارف راسى من رجليا ..وعقلى بياخد ويجيب ..ومش عارف أرسى لى على بر...ناس تقول لى: ازاى ياسلامه ح تفرط فى أرضك  اللى هى عرضك وتبيعها وتسافر بلاد بره....وناس تانيه تقول لى  انفد بجلدك واهرب من البلد دى ياسلامه...البلد رايحه فى داهيه ...الحق اخرج من البطاله والعطاله والايد البطاله اللى انت فيها ....الحق اهرب قبل ما يدخلوا الأمريكان ويدهسوها ...الحق اعمل لك قرشين للزمن....وانا مش عارف اعمل ايه...؟؟؟ عشان كده انا لجأت لكم لاجل النصيحه.....تنصحونى بإيه...؟؟؟ وجميلكم ده على راسى من فوق .....هى دى المساعده اللى انا عايزها منكم ....تنصحونى بإيه الله يعمر بيتكم ؟