هى مصر...

لما قام الفجر فيها

صلوا على راسها صلاة العصر؟

مش هاممنى الا خبطة صدر أمى

لما شافت دبابات العدو فوق الجسر

قلت يامه صبرى نفسك شوية

النشامى ح يحرقوها ..

إن بعد العسر يسر

خبطت تانى على صدرها

قلت يامه حرام عليكى

لسه ح اخد تانى صفر؟

يامه ردى.... ليه سكتى..؟؟

ليه بتتجمد ايديكى واحنا

تحت الشمس ضهر؟

يامه مش ح اسكت عليهم

يامه وحياة الصبايا

إللى ساحوا ف دمهم

والدم طهر

يامه وحياة الفرات اللى شربته

حد شاف الدم نهر؟

لسه يامه ح امشى تانى فوق جروحى

لسه ح ابكى

لسه ح اطفح دم قلبى

آآآآآآآه يامه من نافوخى

الا هو انتى العراق...؟والا يامه انتى مصر؟