Şîna Aşiqan

Bedelê feqîr hecî

Elmanya 2003

Dema dilber neçar bûyî xatirê bixiwaze û dûr here ,

bi rûkên wêda firmêskên dilkeser û kovandara hatine xiwar ,

destên xiwe ji bo xiwedê xiwe yê daliqandî li ser xaçê bilindkirin ,

lewa jî tiracîdiya xaçkirina hezretî Îsa dubare bû ,

ewî daxiwaz ji celada kir , hinekê lêxistina bizmara li esr dest û pên wî gîroken ,

da ku ji xaça xiwe were xiwar û rondikên qîza xiwe bimale …….

Dengê nalîn û ofînên min jî gehiştin tev dera , li erda û hem jî li ezmana ,

mestî sikranim ,

ketime coreke giran ,

bûme nexiweşekî pirr bê hal ,

taya mirinê ez girtim ......

li ezmana firîşte û horîya semaya xiwe ya perwestinê ya kû li dora Xiwedê dikirin û dizivirrîn rawestandin û kirine govenda Mewlanayê romî ,

dakû bîrewerya aşiqê mezin Şemsê tewrêzî li darxin û hinekê beşdarî xemên mirovan bin û piştevanîyê li wefadara bigirin ......

Belê ji bo xema dilê me ,

Bûdayê hekîm kenîya xiwe ya her û her deqîqeyekê rawestand û beşdarî xemên me bû ,

li Gelgamişê somerî   û  mîr Mihê êzidî  sivik bû karesata mirinê ,

hinekê xiwe ji bîr kirin piştî bi halê me yê perîşan zanîn û gotin :

tenê aşiq zîndîne û nemirin ......

Ji bo xatira derdê me ,

li Bexdayê Helac dûbare sax bû ,

Helac li gemyekê yî siwar bû û bi robarê Dîcleda bo sefereke tim û tim û nevegerr di ço û banî dikir :

ezim Xiwedê û ,

Xiwedê eşqe û ,

tenê aşiq Xiwedê nas diken ......

Ne her eve ,

Beko ewan jî , li kiryarên xiwe peşîman bû û lêborîn ji Mem û Zînê xiwest,

Û soz da çu carên din bê dilya aşiqan neke ......

Temûzê Babilî jî şîn gêrra û mana xiwe li cîhana bin erdî dirêj kir û êdî ne xiwest vegerre ,

Lewa jî ,

Hekîmên Misrî û Girîkî porrê xiwe tiraşîn û bi pê xiwasî xiwe pîşandanek birine derê komelgehên Xudawendên Olimpîya û girîn û ,

Metrsîya wê yekê xuyakirin ,

Lewa jî Zîyos derket û soz da ,

seferê li gel Îştarê li binya erda biket ,

da Temûzî qayîl ken kû derkevte ser erda ,

ji ber kû ,

aşiqên genimî tev li hîvîyêne û jiyan bêy vegerra wî êdî hew berdewam dibe …..

Belê , belê , ji bo xemên me ,

ji bo keserên me ,

ji bo şîna me ,

gula pelgên xiwe werandin ,

li ezmanî kesk û sorê rengê reş li xiwe zêdekir ,

pelatînik li beharê hew xuyabûn ,

deryayê êdî gemî hew hewandin ,

zarok êdî hew girnijîn ,

dayika lorkên xerîbîyê ji bo dergûşên xiwe vegêrran ,

Bilbila ,

bilbila sirûdên eşqê hew sitiran ,

sazbenda êdî mozîk hew jenîn ,

saqî ji meyxanê turrebû , û êdî hew qedehên şerab û meyê dagirtin ,

volkan vemirîn û êdî hew agir rijtin ......

borîn wext û zeman ,

geryam li her cî , û  min pisyara dilbera xiwe ji geleka kir ,

ji bayî , ji rojê , ji robara , ji daristana , ji kulîlka , ji refên qaz û qulinga , ji qintarên xezal û pezkûvîya , ji şoreşvanên serê çîya , ji koçerên deşt û zozana , û ji Xidirê zînde ......

teva got :

belê em wê nas diken ,

li mehê carekê em wê dibînin ,

ewe,

heyva ,

çarde ,

şevî ............................................