محتويات الإدراج الذي تريد إرساله:
إيه دخـّـل إسمك فى الموضوع دلوقت ؟!
إلى الشاعر والناقد السكندرى الراحل / صابر فرج
الذى وافته المنية فى مساء السبت 27/9/2008 الموافق 27 من رمضان 1429
*********
إيه دخـّل إسمك ف الموضوع دلوقت ؟!!
شوفت ازاى
مابقاش يجمعنا غير سيرة الموت
شوفت ازاى الدنيا غريبة اوى
دلوقتى عرفت انا ليه ماقدرتش اقولك حاجة
واتسمرت مكانى ...
وانت بتدى الخمسة جنيه للقهوجى آخر مرة
وبتضحك وتقولى وانا قايم احاسب
: مايصحش عيييييب
دلوقتى فهمت انا ليه ماحاسبتش قبلك
فاكر لما واعدتك اجيلك ويا ( حسام )** وماجتش
طبعا ً مانا كان لازم مااجيلكش
طب كنت حارد لمين الكتب اللى حاخدها
والدراسات اللى انت مجمعهالى على جاهين ؟
كان لازم حاجة تعطلنى
أصلى ماكنتش حااستحمل اشوفهم
قاعدين من غيرك بيبصولى
وانا متذنب قدامهم مش عارف اوديهم فين
ياااااااااااااااه
ده اتارى مش بس الغربة اللى بتدبحنا ياعم !!
ده كمان سكينة الموت ف الغربة فظيعة بشكل !!
دانا لسه يادوبك من ساعتين مفتكرك
وانا باستغرب وباقول :
ايه اللى مخلى ( حسام ) بيواظب على مواعيدك للدرجة دى؟
الواد ده عجيب بصحيح
غاوى تمللى يروح للحتت اللى احنا مابنشوفهاش
مش بس ف شعره وحزنه وريحة الموت اللى مصاحبه عينيه
لأ دا كمان فى قراية قلب الناس من جوة
يخرب عقلك (ياحسام )
والله آمنت ان انت رفاعى بجد
طب عارف وحياة المصحف
انا اول مافتحت الصفحة بتاعة ( شوكت ) ****
خفت
مخى ركب طيارة من الرعب وراح لبعيد
كنت مفكر ..........
.....................
لكن اول ما قريت النعى شهقت
إيه دخّـل إسمك فى الموضوع دلوقت ؟
سبحان الله
بقى شوكت هو اللى بيكتب نعيك وانت هناك ؟
هى بتعمل كده ليه ويانا الدنيا دى؟
شوف احنا قعدنا بندعى لشوكت
وبنتخيل شكله و نتكلم عنه ازاى
طب ايه رايك اول ماقريت النعى انا شوفته بجد
كان بيعيط والله
وبينده على ( كرسيك الوحدانى ) ***
يتلقى العزا وياه
ليه كنت ُمصمم رغم الزعل اللى مابينا
تاخد سيرتى وبياناتى وتكتبها بخطك
على ضهر ديوانى ؟
دلوقتى فهمت
طبعاً ....
أمال كان مين حيكمل غيرك يعنى الببلوجرافيا ؟
بس ياترى لو نزل الجزء التانى
حيلحق ( مافيهاش كوابيس )
يغريك تديله مسافة فى روحك
ويقولك على اللى انا ماقدرتش اقولهولك
وانا باشرب أخر كباية شاى وياك
أيوة ....
اتاريك كنت بتستعجل علشان تلحق ليلة القدر
إيه ...
هو انت صحيح صدقت انك مت ؟
ماتصلى على اللى حيشفع فيك ُأمال
هو انت بتنسى كلامك
* (اقعد ف ريح قبرى
عدد على الأحياء
وسيب الميتين
دا الحى ميت ؛
واللى ماتارتاح )
........................
...........................
فاكر ولا نسيت ؟
* ( فا عشان تعيش
لازم تموت
وان مت كون عالى الجبين
ماتموتش محنى القامه
وافردها )
لو بس اعرف ...
كنت إتاخرت شوية وأجلت ميعاد الطيارة
كنت اتسندت على( الكرسى الوحدانى ) وجيتلك
علشان اقدر اشوف ولأخر مرة
( الفراديس ) ف عينيك
إيه ... حتعيش الدور إياك
أرجوك انا مش ناقص دلوقتى هزارك
خليك مستنى ( حسام ) ع القهوة
وسيبنى وانا مسافر
اشوف اللى انت كتبته على امبارح .
*( وسع ياواد لأمبارح الطيب
جايلك يعزى
والعزا واجب .)
جدة
29/9/2008
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
* مابين الاقواس من أشعار الشاعر الراحل / صابر فرج .
** حسام حسين صديق الشاعر الراحل .
*** من قصيدة للشاعر الراحل .
**** وهم من اختراع الشاعر / حسام حسين .
|
