محتويات الإدراج الذي تريد إرساله:
واقف براكى
واقف براكى
كان لازم يعنى
أقوم الصبح أسلم
على كل الناس اللى انا باعرفها
وما اعرفهاش
ولا اطولشى اتوضى بدعوة (همسة )
وضحكة بيرقينى (محمد ) بيها
ف أول يومى
والكلمة اللى اتعودتى تقوليهالى
من يوم ما قفلنا علينا أربع جدران
( خلينا ف قلبك وضميرك )؟
كان لازم ...
تسرقنى سكينة الغربة
وتبعد بينا بلاد وبحور ووشوش
علشان أقدر أحس بمعنى وجودكم جنبى ؟
يا سلام ع البنى آدم !!!
جوايا حاجات ...
مش طايقة تبص ف وشى
مش عارف ابرىء وجعى
من ذنب كبير
ناحية كل الايام الفايتة ف عمرى معاكى
عامل زى ماكون الدنيا
خدتنى على خوانة
فاجأة لقيتنى
( عود درة وحدانى ف غيط كمون )
طب عارفة
على قد ماكانت جوابات القط لفاطنة ..
بتبهرنا زمان
وبنقعد نضرب كف بكف عليها
دلوقتى وكل ما باقراها
بتحز ف روحى
مش عارف إذا كنت بابالغ ف مشاعرى
عشان واحشنّى
ولا دى أنانية غربة
مش عارف حتى اذاكان
فيه فرق مابينهم ولا مفيش
آااااه ....
حتى الآه اللى اتعودت عليها
بقى ليها طعم غريب
حاسس إنها طالعة بدم الروح
معلش تعبتك
بس انا ماقصدتش أفضفض
ولاازود وجعك
أنا قلت ابعت لك صورتى
لما لبست النضارة
آهى حاجة تخايل
( هففانى عليكى شوية )
يمكن تضحك على شوقك
وتعدى معاها يومين
م الايام الرزلة اللى بتتلكع
واللى انا باتحايل على ثوانيها تمد شوية
حاسس إنى باسابق كل دقيقة باعيشها
يعنى انا دلوقتى
بينى وبين الوقت المحاصرنى
ف موبايلى ..
وساعتى
ونتيجة الحيطة
وشاشة التليفزيون
يجيى أكتر من ست شهور
هانت !!!
كلها شهرين وارجعلك
ولغاية ما ارجع آهى عندك صورى
بس بلاش ...
تضحكى على شكل النضارة ف وشى
ياااااااااااااه
عارفة أنا إيه دلوقتى اللى قاتلنى
إنى برغم العمر اللى قضيته ما بينكم
مش عارف
إن كنت قدرت أسيب جواكم حاجة
ولا انا كنت الضيف
اللى زيارته تقيلة على صحاب البيت ؟!
حاسس إن انا من يوم ماعرفتك
واقف براكى
لا دخلت لروحك
ولا حتى طلعت لروحى
حسيت دلوقتى
وانا شايف الدنيا ف بعدك
بتكشرلى بشكل مخيف
سامحينى !!!
وان كان مكتوب لى رجوع
فانا ناوى من اللحظة دى أكون
مش ضيف !!
جـــــــــــــــدة
17/4/2007 م
|
