محتويات الإدراج الذي تريد إرساله:
قلم فشي شكل
اليوم ماطيبناش، أنا مامقتانعاش بالكوزينة كيف قال لي اسي عبد الله المغربي، وصاحبي مامسوقش، داكشي علاش قلينا شوية دلبيض بزربة ، باش ما نتعطلوش على المدون اللي غانزلوا عندوا اليوم، المشكل تلفات لينا لاكارط فيزيت ديالوا، وهو باش تزوروا ضروري لاكارط فيزيت ، حيت ماشي بحال خوتنا المدونين المزاليط، هو مدون صحيح، كاتب فلاكارط فيزيت ديالوا مصطفى إسعد مدون وكاتب ومحلل صحفي، راه ديما كاتغوت عليه الجزيرة ايدير ليها شي تحليلات صحافية ، وشي مرات أخاي رويتر كاتقلب عليه بالريق الناشف.قولت ليه لصاحبي زول ديك الدربالة وقاد الحالة ، باش نمشيوا عند القلم ، صاحبي ماكايحملش كلمة القلم حيت عند الفقها المغاربة كاتعني الذكر، بصح أنا الدنيا هانية، بنادم ايفتاخر بالأعضاء ديالوا وحتى أعضاء التدوين.
المهم جمعنا استونات ديالناوتمينا غاديين عند صاحبنا، وحنا خايفين مانلقاوهش، حيت عندوا واحد الجريدة كتصدر من المغرب وإيطاليا وحتى هي ألكترونية بحال القلم ديالوا، خاي الله افتراضي فكلشي، بحال صاحبي داير واحد المدونة كتصدر فعشرين بلاد حيت كلشي عندو المو دباص حتى من المريخ إلى بغيتي.
اسي مصطفى مرحبا بنا عندك صحة، وبلا ماتبقا تفتف قاد لينا شي براد وخلينا من لاكارط فيزيت راه ماعندنا جياب فين نديروها.
بيت الضياف:
القضية مقادة عند اسي مصطفى، عامرة بلبلايك بحال شي تيران دلفوت ، شي طالع شي نازل وبيت الضياف تقول عليها مصايبة بالجينريك،
ها العنوان دلمدونة هالعنوان دلجريدة ها تليفون وغير اللي مابغاش ايتصل بسي مصطفى وكل الطرق تؤدي إليه ، قال لي صاحبي كانخاف نشري ميكة فالسوق ونلقى فيها عنوان اسي مصطفى.
كاينو واح الطبلة واعرة أصاحبي ، فيها كل البلايص فين ايشكي بنادم ولا يقاد الحالة لمدونة ديالوا، حيت مصطفى إسعد مبيسطوني فالتدوين كلشي كايعرفوا، وكلشي عندو لاكارط فيزيت ديالوا
ومانساوش واحد الحيط فالبيت صبغوا اسي مصطفى بالأحمر والأخضر ورسم عليه الراية الوطنية، حيت هو وطني مجهد، كيبغي لبلاد بزاف ، فآخر ادراج ديالوا قالك ماعندنا لاديموقراطية لانم، وحكومتنا مقودة اقضية عندها وحامضة ، قال لي صاحبي شكون حكومة واش ديال سيدنا، قلت ليه سكت ، راه هاد الحكومة اللي ماعجباش للسي مصطفى هي اللي كاتدافع على القضية الوطنية دلبلاد راه غير تخالطوا ليه الدواصة.راه هادليامات كتب على البصري والعهد الجديد وقال ليك ماكاين غير قطيع الريوس، وايلي قطيع الريوس فعهد سيدنا ، قلت ليه لصاحبي سمع هاد الفقرة من المدونة ديالوا تايقول اسي مصطفى:(
أول شيء مر خلال هذه الأيام وكان له الأثر البالغ على الساحة السياسية المغربية موت إدريس البصري الشخص الذي يتدكره الكل ويترحم عليه ..نعم الكل ترحم عليك لأنك كنت تحدد الخطوط ومن تعداها تقطع رأسه أما اليوم فالحدود ملغية وشعارات الحرية وحقوق الإنسان هي المسيطرة ولازالت الرؤوس تقطع بطريقة وقحة...).
ومافهمتش أخويا هاد اسي مصطفى عندوا بزاف دلوجوه، المهم قلت ليه لصاحبي ماتزربش أجي نشوفوا كدايرة عندو الكوزينة فين كايطبخ الإدراجات هاد أتاي راه تعطل.
الكوزينة:
واحد مولاي الطاس كبير فالكوزينة ديال اسي مصطفى، وعامر بالصبايغ ، ماكاين غير التبنتير، واحد الطاس كاتب فيه البانتورة دالمدونين، كايستعملوا فالتعليقات اللي كايخدمها كدعوات لمدونته، واحد الطاس فيه البانتورة دالدولة سميتو ا مغربنا ، وراه المغرب ديالنا جميع أجمي، وقاد معانا السرابت. واحد الطاس فيه البانتورة ديال المواقع ، واحد الطاس فيه البانتورة اللي كايصبغ بها مصطفى راسوا.
كايخلط اسي مصطفى هاد الصبايغ ويخرج ادراج وديما بحال عماد انتيفي تايقول اكيد لن تندموا.
وسبير ستار دلمدونين وصافي.
والمهم أسي مصطفى لوح علينا هاد الصبايغ ودير شي معقول ، راه غانرجعوا ويلا لقينا الصبايغ غانسيبوهم فبيت الضياف.
بيت النعاس:
وناري أصاحبي ، مالقينا والوا فبيت النعاس عند اسي مصطفى ، حاجة وحدة اللي فالبيت ، واحد التصويرة كبيرة ديالوا عالقها فالحيط ومدور عليها المرايات.
مافهمنا تا وزة وخرجنا.
المرحاض:
أسي مصطفى ، راه زعما كاين جافيل والمسحوق، وقاد المسائل ، القضية راه حامضة ، شني قلتي، ماش نرجعوا عندك قريب.
وماتقلقش ، والا بغيتي تقلق غير تقلق، المهم قاد المسائل، صاحبي راه تعصب .
|
