لحظة أمل

لحظات كتير بتمر ما بتترك أثر...و لحظات تساوى عمر من عمر البشر

و ساعات نحس إن إحنا طايرين فى السما... و ساعات نحس إن الأمل فينا انكسر

أوقات نحس إن الحياة مش ملكنا... و ساعات نحس إن الحياة إنتي  و أنا

لازم نعيش حلو الحياة مع مرها.... و نصادق الأيام بخيرها و شرها

و إن كنتى خايفة من الحياة  حبى الحياة... دا الحب يشعل فى القلوب شمعة أمل

و أما الظروف تأسى و تكسر حلمنا... عمر القلوب ما حتنكسر مهما حصل

و الحب لو عشناه ينور دربنا... و لو نسينا الحب نبقي مش بشر

نزرع زهور الحب فى وسط الصحر... نسهر ليالي الحب حاضنين القمر

نتمنى نهر الحب يروى زهرنا ... أشجارنا تصبر لما يرويها المطر

فيه ناس كتير نبض المشاعر نبضها... و ناس بسيطة و عايشة  راضية بالقدر

ممكن نعيش حابسين مشاعرنا...بس الجميل لو المشاعر تنتصر

خلينا نحلم حلمنا من غير حدود... نحلم بلحظة يبتسم فيها الوجود

لحظة تمر علينا و بتترك أثر...لحظة تساوى كل أعمار البشر