هذا طرف من السجادة المزعومة

ما يتعبني أنني عودت يراعي على الكتابة بالفصحى وذلك واضح من مواضيع مدونتي .. ولكن لحديث السجادة شجون سأظهره في بساطة ولغة عامية .. فاستحملوني ( بدأنا ياهو !! )

عموما .. اللي يحس إنو مو فاهم الهرجة .. ممكن يدخل على مدونة القائد ويقرأ خواطر معتكف 1 أو 2

طيب .. الهرجة من البداية - عشان تعرفوا – ماهي في السجادة والسر ماهو في حتة أنسجة متشابكة من الخيوط .. الهرجة وما فيها تكمن في دهشتي لما جاني واحد من محبي الخير ( وأنا في الحرم معتكف وقدامي سجادتي وجنبي ثامر ) وأشار لي بعدم جواز الصلاة على هذه السجادة .. بل حتى استخدامها ؟؟؟

من جد جلست مندهش لفترة .. وإلى الآن ماني قادر أستوعب إنّو لازال إلى الآن مثل هذه النماذج عايش على وجه الأرض !! .. حسبتهم خلصوا مع جهيمان !!!!!!!

طيب كيف يا أبو الشباب ( أشِّر ولاّ غمّاز ولاّ أي حاجة ) ما يجوز مرة وحدة .. طيب قول مكروه ممكن تنبلع .. لكن ما يجوز ؟؟؟

طلع الرجال مصلي عليها أثناء ما صلينا في مكان ثاني وتركناها .. وما شاء الله عليه شدييييييييييييد الملاحظة .. لدرجة إنو ما قدر يصلي عليها ؟؟ .. إيش الهرجة ؟ بصراحة سجادة غريبة ( كله منك يا أبو الطيب ) ...

المهم .. سألته .. ليش ما يجوز .. فقال لي فيها صلبان كثيرة .. وأشار لبعضها ؟؟؟

دههههههههههههههههشة

أنا وثامر لنا أكثر من ثلاثة أيام نصلي عليها وما لاحظنا ولا صليب واحد ؟؟؟

أنا عنِّي سكتت .. بس ثامر جزاه الله خير ما قصر في النقاش ( ويعجبك في الأشياء دي ) .. يقول لنا إنو أعداء الله صنعوا هذه السجادة ومثلها ووضعوا فيها الصليب عشان نصلي عليها ..

دههههههههههههههههشة

رد عليه ثامر وقال له إنو إحنا ما نوينا إننا نصلي لصليب .. إحنا نصلي لله .. وبعدين اللي يدقق كثير في مثل هذه الأمور يتعب .. حتى إننا طلعنا كم صليب في زخارف الحرم وجداره .. ( كيف نصلي في الحرم وعلى جداره صلبان ؟ ) .. المهم .. الرجال مسكين وضعه تأزم خصوصا بعد ما سمعنا كم واحد من اللي حولنا .. وواحد منهم قال له إنو حتى الشماغ فيه صليب ( كيف نلبسه ؟ )

المهم .. الرجال مشي بعد ما شكرناه .. وبعدها توجسنا من موضوع الصليب خاصة بعد ما تكرر الموقف معي مرتين .. والمرة الأولى كانت على ساعة الفجر ؟؟؟ .. إيش قصتها ؟

كنت أصلي التهجد .. وبعد إحدى التسليمات سألني اللي جنبي عن الوقت فاستغربت لأنو جنبنا في ساعة حائط .. المهم طلع الرجال مو جنب الوقت .. طلع عنده حاجة ثانية ؟؟ .. قلت له كم الساعة فسألني على طول ( هذه ساعة الفجر ؟ ) حسيت إنو يبغى شي ؟؟ .. قلت له إيوه .. فقال لي هذه فيها صليب !!!!!!!!!!!!!

دههههههههههههههههشة

قلبت الساعة أدور .. وما لقيته ...

قال لي افتح الساعة ..

 فتحتها فوجدت الصليب المزعوم ؟؟ ...

 ما أدري إيش أقول غير إني ناقشته على عجالة وخلاني أفكر في عقليته بقية الصلاة ( شغلني ) ... وبعد الصلاة سلمت عليه وناقشته .. وما أنتهينا على شي إلا إنو حس إنو ماله داعي ...

أنا اللي حزنِّي مو السجادة ولا الساعة ولا الصليب .. اللي حزّني إنو أحبابنا جدا حريصين على الخير وحركتهم جدا جميلة في التناصح .. لكن الشي اللي نصحوا فيه كشف لي اهتمامهم بالجزئيات التي لا ترى .. والله المستعان لو كثر من يهتم ويغرق في الجزئيات .. بل ويعادي ويصنف لأمور جزئية بل ربما وهمية ...

أتمنى ربنا يجعلنا من النشيطين في الحركة والإصلاح والتناصح والتوعية .. قويّون في أفكارنا واعتقاداتنا .. نعلم المهم من التافه .. والفرع من الأصل .. والوهم من الحقيقة ...

هذا ببساطة موضوع السجادة.. وإن شاء الله الإعتكاف القادم حأختار السجادة بنفسي عشان ثامر وأبو الطيب لا يجيبولي الشبهة من سجادتهم هذه ( اللي صنعها أعداء الله ؟؟ )

تحياتي للجميع ...