الحوش
--------

حوش الدار و احنا صغار
ياما ضربنا عرضه في طوله
بالمشوار
حسبه بسيطه الناتج فيها
عشر امتار
و بطباشيره
كان يتقسم كام تقسيمه
متر للعب البلي
و تاني لأولى
و متر لسيجه
واللي بيبقي
للغمايه او للكيكه
حوش الدار
رغم ان احنا كنا كتار
عمره ما نقى في يوم و اختار
من اسامينا
ولا همه هيئه اهالينا
كان من شدة خوفه علينا
يقفل بابه و يخبينا
ناقص بس إنه يطير بينا
و في يوم بنلف على أجنابه
لما وصلنا لحد أعتابه
إيد اتمدت فتحة بابه
طلعنا جرينا
بنسابق بعض في خطاوينا
وشي النونو طلع له وشوش
و ش بيضرب وش يلاقي
و وش يحوش
وش قابلته في صوره قديمه
ولا عرفتوش
و أما سألته قال لي حكايته
قالي بأنه أختار لنهايته
عتب الحوش