سِنِه مِنْ عُمْري حَقّْها عشر قروش!! ـــ

من حكايات أبو توفيق باللهجة العامّيّة الفلسطينيّة

من اثنين وخمسين سنه,أخَذْني أبوي من المَزِّه للشّام مَشي....وكنت أنا يومْها حافي...ظلّينا ماشْيين تاوْصِلْنا على سوق بقولولُه سوق الصَّرامي..قريب من الجامع الأموي..بسْ أنا وصلْت مْنَهْنَهْ عَ الخالِصْ... أبوي اشترى لي صَنْدَل,ودَفَعْ لَلْبَيّاع ليره وْنُصّْ...قال لّه البياع:لِسَّه يا حَجّي باقي عَشْرِ قْروش...يَمْ أبويْ فَتَح الجِّزْدان تَبَعُه وشَقْلَبُه وقال له:هِيّاتُه مثل مانْتِ شايف,الجزدان أنْظَف من دُبْر الخَطيب,والله يا عمّي مَمَعيش غير اللي اعْطيتَك ايّاهِنْ,سامِحْنا بهالفرَنْكين,وَالله ياعمّي إسَّه راجع أنا وهالولد عَ المَزِّه مَشي,وبُكْرَه في عنده فَحِصْ بالْمِدْرَسِه,ومدرسته في الشام,لوْمِدرسْتُه قريبِه كان راحْ حافي...

البيّاع شِفِقْ عَلَيْ وعلى أبويْ وسامَحْنا بالعشَر قروش...قمت أنا شو فرحت وكَيَّفت...  جيتْ تَألْبَس الصندل,وِلاّ أبوي بقول لّي: لأ استَنّا خلّيه يابا لبكره مِنْشان المدرسه والفحص,قلت لُّه :طيّب يابا.

ورْجِعْنا من الشام للمزّه كَعّابي, آ , بَسْ انا كنت حافي,إجْرَيْ تَخّوا...وفي الطريق شُفِتْ بيّاع عِرِِقْسوس ,شو أمّا أنا مِيِّتِ مْنِ العَطَش,لكن ماستَرْجيتِشْ اقول لابويْ بدّي أشرب عرقسوس,ليش لإنّي عارف إنّه مَمَعوش ولا فْرَنْك.

بلا طول سيرِه وْصِلْنا عَ المزّه....ومع كل هالتّعب,أنا ماصدَّقت وينْتا نِوْصَلْ...دّكّيتْ هالصَّنْدَل باجْرَيّي وقَوامْ طلعِتْ عَ السَّهِلْ...ظَلّيتْ ألْعَبْ بْطابْةِ الشّراطيط تامِنّي اسْتَويتْ عَ الخالِصْ...وُمِنْ كُثرِ اللعُب انْقَطَعِ الصَّنْدَل....وصُرْتْ انا اعَيِّطْ عَ الصّندل..شو بدّي أسَوّي ماعرفْتِشْ ..حْمِلْتْ فَرْدِةِ الصّندل المقطوعه وُرَوَّحِتْ عً الدّار زَعْلان وخايِفْ..قلت لابويْ: يابا انْقَطَع الصَّنْدَل,بِدّي فْرَنْكين أروُح أصَلّْحُه...قام أبوي طلع خُلْقُه عليّْ وقال لّي:مَفِشْ,وُمُطْرَح ماكُنْتْ تْكاكي روحْ بيِض...

وثاني يوم مارُحْتِشْ عَ الفحِص...مَهو كيف بدّي أروُح حافي؟...وراحتْ عَلَيْ سِنِه كامْلَه من عمْري عَشان عشر قروش!!!

  محمد توفيق السهلي