محتويات الإدراج الذي تريد إرساله:
أقرى الحادثة
*بصراحه.مش عارفه نبتدي منين الحكاية.؟؟لسبب بسيط انها
مش حكاية لكن تقدر تقول نفضة مخ تعبان ..شغال ع الفاضي
و المليان..يعني الناس لما تبقى مرهقه من الشغل و
العيال ..و حال الدنيا المقلوب بسبب الحروب..تتلقح
تستتريح..و تلغي أوبشن التفكير تماماً..بس فيه بشر زي
حضرتي غاوية و الله أعلم التعب
..باختصار احكي لكم اللي حصل و انتم أحكموا
** رجعت من الشغل متأخر تعبانه و حاسه الدنيا لونها
مترب..و رغم كده مش جايللي نوم..و لأني عارفه عني
ده..تلاقيني كل يوم و أنا راجعه أفوت على كشك الجرايد
أشتري كل اللي صدر في اليوم ده..و لأن زي ما سبق و
نوهت أن أوبشن التفكير عندي فاتح ألاربعة و عشرين ساعه
لاحظت في الجرايد حاجة غريبة و مضحكة ..اللي هي؟
زمان قوي من حوالي تلاتين سنه و ده موثق في الأفلام
كان بياع الجرايد يجري في الشارع و هو بيصرخ و يقول
" أقرى الحادثه." .."القبض على حرامي الغسيل"
وده له أكتر من دلاله..
1- ندرة الحوادث و بالتالي حدوثها و الأعلان عنها يزيد التوزيع
2- تفاهة النوعية بالنسبة لحوادث انهارده
نيجي بقى للأيام الكحلي اللي احنا عايشنها..
1- أصبح هناك صفحة حوادث في كل جريدة
2- أصبح هناك خمستاشر جريدة متخصصه في الحوادث
3- أصبح هناك نوعيات من الحوادث مجرد نشرها يعتبر حادثة
*وده طبعاً مش محتاج تعقيب..لكن اللي يفرس بقى هى
الصوراللي مصاحبه للحوادث..
*يعني تلاقي جنب حادثة أغتصاب فتاة في عز الضهر ..صورة
شاب شيك جداً و مبتسم في سعادة..عارفين مين..؟
سعادة الضابط اللي قبض على الجاني..أو وكيل النيابه اللي
حقق في القضية..أو حتى المستشار بتاع المحكمة
* لكن الجاني في الحفظ و الصون..رغم أن زمان أيام جحا
كان في قانون أسمه" الجرسة" أو الفضيحه..و كانوا يجرسو
المتهم بأنهم يركبوه الحمار بالمقلوب و يلفو بيه في البلد
و العيال تزفه..بقولة الحرامي أهو..وده على فكرة لسه
موجود في بعض القرى و النجوع..لكن الدنيا اتغيرت و أصبحت
هذه النوعية من الجرايد تفبرك حوادث مقززة لزوم التوزيع
..و الأدهى انها تستعين بصور أجنبيه كلكم عارفينها..
أما أسلوب الكتابة فحدث ولا حرج ..درس خصوصي مجاناً
في أحدث أساليب الجريمة..
* مش عارفه هل أنا مبالغه في قرفي..؟؟
* ولا فعلاً الموضوع يحتاج تفكير ؟
منى الصاوي
|
