كل سنه وانت طيب يا ريس 85 سنه

فاتوا من عمرك منهم 25 سنه وانت حاكمنا (مزهقتش) وعملتلنا احلى صرف صحي فيكي يادول البحر المتوسط ومصر في عهدك بقت الاولى في الفشل الكلوي و فيرس c والسرطان والانيميا (يعني فقر الدم ) والتلوث وانفلونزا الطيور و شلل الاطفال موجود في ثلاث دول بس في العالم احنا منهم



كل سنه وانت طيب يا كبير ياللي علمتنا قيمة الجنيه وحسستنا عملي بمعاناة اخوانا في الصومال مع ان ماكنش عندهم ازمة طوابير ا لعيش بس الحمد لله اننا سبقنا



كل سنه وانت طيب يا معلم وانت حظك وقع في شعب ابن .. ما طمرش فيه كوبري 6 اكتوبر ولا ازازة الزيت ام 10 جنيه ولا حتى حسن شحاته وقال عاملين اضراب يوم عيد ميلادك هو اليوم ناقص سواد

كل سنه وانت فاقع مرارة حسادك وخليك عايش سنه ورا سنه ذي الحصان ولا بيأثر فيك حاجه بسم الله ما شاء الله الشباب بيموت وانت قاعد تربي في صحه

كل سنه وانت طيب يا من ولدت في عهده ولقيت تعليم ذي الفل وجامعه 100/100 وان شاء الله لما اتخرج حلاقي قهوة جنب البيت اسعارها حنينه اقعد فيها

كل سنه وانت ومشاريعك القوميه طيبين لما جيت سنة 81 قلت حتقضي على الاميه سنة 2000 وادينا اهو سنة 2008 وقربت تقضي على الشعب كله

كل سنه وانت وحبيبك العادلي مروقين مصيفين في راس الحكمه وشرم بعيد عن المعتقلات والسجون وحبس الصحفيين واعتصام القضاة وادي الصيف داخل الهي ما توعى تشوف حاجه تزعلك وتفضل مزقطط على طول ونكد على امنا براحتك

كل سنه وانت برنس وعقبال ما تفرح بجيمي وتشوفله شغلانه بنت حلال قبل ما تفرقنا قادر يا كريم بعد عمر طويل طبعا

كل سنه وانت طيب وابن كلب اللي يقول غير كده يا عمده

تحب تقول ايه للريس في عيد ميلاده
بس وحياة ابوك ابعد عن ربنا يديك طولة العمر وعقبال 100 سنه