بصراحة مش عارفة ابتدى منين ولا ازاى بس انا مكسوفة من نفسى ومن الشعب اللى مابيحمدش ربنا.

يعنى امبارح الريس حبيبنا كتر خيره كان منور فى التليفزيون المصرى المحايد فى خطاب بمناسبة عيد العمال وقال خبر انا لما سمعته اغمن عليا  والعيش والملح ,ولا بلاش العيش بقى ترفيه اليومين دول.

المهم انا سمعت الخبر ان المرتبات هتزيد 30% حتة واحدة كده خبط لزق رزع ضرب وفضلت اعيط واعيط.

مش من الفرحة الصراحة بس من الزعل والكسوف يعنى احنا ظالمين الراجل الكبارة ابو تمانين سنة ونقول مجوعنا والمرتبات مابتكفيش العيش الحاف والحالة جيم وسين وكل الحروف الابجدية والاسعار نار ,والراجل كتر خيره زود مرتبات القطاع العام 30% .

بذمتكم مش احنا شعب ماعندوش دم يعنى الراجل فى شهر عيد ميلاده بيزودنا بدل مااحنا اللى نديله هدية هو اللى بيهادينا .

ومن كلامه حسيت انه هيطلعنا الفلوس من جيبه الخاص شقا عمره وكفاح 80 عام من فلوس علاء وجمال ولاده.

بذمتكم مش مكسوفين من نفسكم وقال اضراب قال الراجل عمل اللى عليه وزيادة.

طيب احسبوها المرتبات عندنا ماشاء الله انا اعرف واحدة صاحبتى مدرسة قد الدنيا بتاخد 170 جنيه فى الشهر مرة واحدة واحسبوا بقى ال30% على المرتب الاساسى خدوا بالكوا يطلعلها مبلغ كبير مش بعيد تجيب عربية بى ام وتحط الباقى فى البنك وماتعرفنيش بعد كده,اه ماهم 30% مش اى كلام.

وانا بفكر اطالب بابا يسفرنى باريس اكمل تعليمى واحضر الماجستير هناك اه بقى ماهو هيزيد 30%

يااااااااااااااااه الناس مش هتعرف تودى فلوسها فين.

بصراحة انا لو منكم بلا اضراب بلاكلام فاضى يوم عيد ميلاد الريس حبيبنا نبعتله هدية قصاد ال30% دول.

بس مش هقولكم بفكر فى اى هدية لحسن احصل اسراء ربنا يطمنا عليها.

وكل 30% وانتوا طيبين