محتويات الإدراج الذي تريد إرساله:
ليه يااسراء؟
مش عارفة خير اللهم اجعله خير بقالى مدة ماليش نفس اكتب اى حاجة,سألت نفسى ياترى يانفسى مضايقة من ايه ومخليكى مش قادرة تكتبى؟
لاسمح الله هو فى حاجة تضايق؟الحياة بمبى وكله تمام والاسعار رخيصة والمواصلات سهلة والشغل متوافر والناس عايشة مية مية.
طيب ايه اللى يضايقنى؟دى بوادر بطر على نعمة ربنا انى مواطنة مصرية وعايشة فى مصر وبتنعم بخيرها.
المهم بعد تفحيص وتمحيص وتفكير وتدبير مالقتش غير سبب واحد بس,بنت مصرية عادية عمرها 28 سنة واسمها اسراء عبد الفتاح اللى شايفين صورتها دى.
قال ايه هى اول من دعا لاضراب 6 يوليو على الانترنت وعشان كده طبعا الحكومة العظيمة بتاعتنا اللى كلها رجالة بشنبات حماة الوطن مارضوش بكده ازاى بنت عايزة تعمل انقلاب على الاوضاع الفل اللى عايشينها!
طبعا مسكوها وحبسوها والشهادة لله المحكمة برأتها الواحد يقول اللى ليه واللى عليه هو اه كل حاجة فى مصر وحشة قصدى يعنى نص نص الا القضاء نزيه وابن ناس ومتربى.
بس بعد الافراج اسراء اختفت وطبعا وحتما ان الحكومة اللى كلها رجالة بشنبات يقف عليها الديك العرفى مالهومش اى دعوة.
بصراحة اضايقت جدا عشانها بنت ولسه فى عز شبابها وقلبها كبير قد مصر ويحصلها كده.
بس بصراحة هى الغلطانة اه هو فى ايه صح فى البلد قصدى فى ايه وحش فى البلد يخليها تدعو للاضراب .
انا لو منها اعيش حياتى واتجوز واجيبلى عيلين اظلمهم فى بلد حتى رغيف العيش فيها بى مشكلة وازمة كبرى.
ليه يااسراء يااختى معلش احنا اخوات برضه فى الاسلام والوطن ؟
ليه يااسراء طلعتى بميت راجل؟
ليه يااسراء صعب عليكى حال اهل بلدك؟
ليه يااسراء حبيتى تفوقينا ؟
مالكيش حق يااسراء.
وايه يعنى مافيش عيش؟والناس بتموت عشان تجيب عيش؟
عادى مش لازم عيش يعملوا رجيم واللى مش عايز يأكل جاتوه كرواسون باتيه,ودن القطة اى حاجة والسلام.
تعرفوا انا بتخيل لاقدر الله المستقبل القريب لما اسرة مثلا عايزة تجيب عيش فيعملوا قرعة عشان حد يروح لان الكل خايف.
واللى هيختاروه هيتسلح ويقول الشهادة قبل مايمشى ويسلم على افرا الاسرة نفر نفر
والى الجهاااااااااااااد ياأهل مصر
اعذرونى خرفت كتير بس ده اللى طلع منى ويابخت من قدر وعفى.
وربنا معاكى يااسراء انتى ارجل من الحكومة برئيسها.
|
