كل يوم بتأكد ان حكومتنا المبجلة عندها ذكاء خارق وبعد نظر واننا كالعادة ظالمينها .

بما اننا بنمر بمرحلة متميزة من غلاء الاسعار او بمعنى اصح جنون الاسعار لا جنون وهبل وهطل .

الاسعار بترتفع بشكل يومى وجنونى وكل واحد بيبيع بالسعر اللى على مزاجه ماهى الحكومة شايلة ايدها من الرقابه على الاسعار والناس نفوسهم ضعيفة وضميرهم ميت.

بس تعرفوا انا فكرت فى الموضوع كويس وبحيادية تامة الريجيم بقى هوس العصر الكل عايز يخس رجالة وستات وبنات وحتى الاطفال بقوا بيطلعوا ماشاء الله الطفل شبه البالونة,طبعا الحكومة مالهاش اى ذنب لاننا بناكل اكل صحى والاسمدة مش من اسرائيل والفرق بين العنباية والبطيخة بقى معدوم  ولا فى اى تلوث ومستشفى سرطان الاطفال فاتحينها للاخوة العرب بس.

طيب فكروا معايا الكل عايز يخس وشوفوا اى نظام ريجيم هتلاقوا لحمة وفراخ وفاكهة وخضار وبلاوى كل دول اسعارهم غالية,ركزوا معايا لما الناس مايلاقوش يشتروا الحاجات دى واصلا الريجيم اللى فيه الحاجات دى بيخسس كتير مابالكم لو لاغيناها؟؟

يعنى اللى عايز ينزل 10 كيلو فى شهر ينزلهم فى اسبوع شفتوا ذكاء وعبقرية وانسانية الحكومة؟

خايفة ييجى يوم ويبقى الفول غذاء الاغنياء فى مصر.

ولا عزاء للفقراء وعمار يامصر.

على فكرة الرابط ده مفيد جدا

http://www.rjeem.com/