محتويات الإدراج الذي تريد إرساله:
حرام يا عم سيد ( جـ 4 )
· عارف يا باشا لو الفكرة دى أنت فكرت فيها و عرفت فوايدها و سعيت لها ممكن تدفع فيها تلات اربع أرانب لكن علشان جيت لك ف العدل و لقيتها سهلة رفضت ...
· يا عم ماليش فيه موش شغلتى
· دى حصانة يا باشا ..حاجة كده تطير عشانها رقاب ... اللى عملته ف عشرين سنة ممكن تلاقيه فى سنة و يمكن فى تأشيرة واحدة بدل ما تديها أستجواب متين
· تأشيرة واحدة ..؟؟
· لوماآخذه الباشا موش معانا ف البلد و لا أيه ..؟؟ حتة أرض ع الطريق الصحراوى ... ملاحة تتردم و تبقى مبانى ... أرض زراعية خارج التخصيص تدخل التخصيص ... خمسين فدان ف شارم و لا الغردقة المتر بخمسة جنية ... و حاجات كده .
· بتعرف الكلام ده م الجرايد يا عم سيد
· لا م القهاوى انت الصادق ... الواد شحتة ابن اختى كنت معاه و هو ماشى مع واحد ف موضوع ... الراجل أخد له تلات آلاف فدان الفدان م العرب بـ 500 جنيه يعنى أرنب و نص و بعدين
· شحتة ده موش أمين شرطة ؟
· لا .. أمين سر يا باشا .. يا عمنا المهم العلاقات و التظبيط .. تظبطهم يظبطوك ..
· المهم يا عم سيد
· المهم الراجل ده كان معاه أتنين ... نائب و المدير بتاع شحتة ... النائب يرسم تكشيرة على وشه و يروح للمسئول علشان يقنن وضع الأرض .. و التانى يكلمهم يستعجلهم و يقولهم موش عايزين مشاكل مع السلطة التشريعية .. البلد موش ناقصة
· حلوة قوى البلد موش ناقصة دى ..
· ست شهور يا باشا .. الأرض هى الأرض و بدل ما سعرها 500 جنية بقت 30000 جنية
· تلاتين ألف ..!!!
· طبعا ما الأول كانت سمك فى مية المليون و نص لكن لما تبقى أرض رسمى م الدولة و معاك عقد يطير بالنسر اللى عليه تساوى ساعتها التسعين مليون أهم حاجة ماتخرجش ع الخط
· أى خط ؟
· على تلاتة يا باشا .. على تلاتة ... اللى ياكل لوحده يزور .. و يمكن يموت و أقله يتحبس ..
· يا عم سيد الموضوع موش كده .. أنا عندى شغلى و كافينى ... الموضوع إن أنا موش فاضى للمسئولية دى .. تقيلة عليى ... و كمان ماليش خبرة فى الأدوات البرلمانية مااشتغلتش قبل كده لا ف حزب و لا مجلس محلى حتى و لا حاجات من دى
· و الله ضحكتنى يا باشا الله يحظك و يسعدك .. هو انت مالك واخد الموضوع جد كده .؟
· جد ..؟ أومال هو هزار ..؟؟
· عارف يا باشا غيرك بقى .. غيرك أنت نقول أيه بقى للى يرفس النعمة .. الواد الشاب يمكن سمعت عنه الصعيدى بتاع الخشب .. الواد ده صرف سبع أرانب فى 2005 و كمان كان الحزب مرشحه و معاه طبعا عارف جاتله جلطة لما خسر من أول جولة و كانت أسرع نتيجة عندنا كسبه الدكتور ده بتاع الأخوان و صرف كده قد سبعة جنية ..
· طب ما تقول لنفسك يا عم سيبد يعنى ممكن تصرف كل مالك و تاخد بمبة
· و الله ضحكتنى تانى يا شيخ .. الكلام ده كان المرة اللى فاتت .. المرادى لا أخوان و لا دياولو .. مفيش قاضى يا باشا .. تخيل بقى موظف م الحى ماسك لجنة و يدخله سيادة العقيد ...وووو ....
· على كده يا عم سيد مفيش لا أخوان ناجح و لا معارضة السنة الجاية 2010
· ليه يا باشا هما هبل لوما آخذة ..؟؟ لازم ينجح قد عشرة خمستاشر عشرين أخوان و ذيهم معارضة و ذيهم مستقلين .. أومال مين اللى ح يكمل سيناريو المرسح يا باشا موش لازم يكون فيه كومبارس
· و أيه درانى ما يمكن أنا م اللى ح يسقطوا تبع الحزب
· شوف يا باشا الواد شحتة ابن اختى رسانى ع الفولة .. الجماعة اللى ح ينجحوا من أخوانا المعارضة و الأخوان ح يتحددوا قبلها .. يعنى يكونوا من غير ضوافر كده و شوية مشايخ مالهومش فى الأستجوابات و الكلام الكبير ده
· و بعدين
· و كمان سيبلى أنا بقى موضوع الدايرة دى و كمان التمويل
· التمويل ..!!
· آه ...
· أنا عندى مفتاح البير ...
· بير .. !!!
· آه الراجل الكبير اللى كنت شغال معاه كان أخوه رئيس شركة قطاع عام و كنت معاهم لما عرفت تفاصيل بيعها و أتباعت ببلاش .. ببلاش
· سعر رخيص للدرجة دى يا عم سيد
· لا يا باشا .. ببلاش .
· ببلاش ..!!! يعنى أيه ..؟؟
· شوف يا باشا الشركة لها مصانع و مبانى و أراضى مبانى و أراضى زراعية و عقارات و مقرات قدروا الشركة وقتها 12 مليون جنيه ..
· قصدك تقول تقدير رخيص . ؟
· لا .. جايلك ف الكلام ... الشركة دى أصلا كان لها 12 مليون جنية مستحقات عند عملاء ... اللجنة أعتبرتهم ديون معدومة و الراجل حصلهم قانونا خلال 18 شهر من شراء الشركة ... يبقى الراجل خدها بلاش و لا أنا موش بعرف أحسب ..؟
· معقولة ..؟؟
· كل اللى عمله الوسيط سافرله و عمل عمرة و لبس الحرام و عطاله تلات أرقام حسابات فى سويسرا و ..... دمتم .
· و ممكن تعمل ايه فى السكة دى كمان يا عم سيد . ؟ تعرف مين يرسيها دى لازمها وزير ؟
· وزير ايه يا باشا صلى على رسول الله
· اللهم صلى و سلم و بارك عليك يا نبى ... أكبر من كده ... أنت كده دخلت فى محظور أكبر م الجماعة المحظورة يا عم سيد
· دماغك ما يروحش بعيد .. لا يا باشا موش أكبر لكن أهم ...
· مين ده . ؟
· اللى معاه التلات أرقام بتوع سويسرا ..
· حرام يا عم سيد
|
