بالمال تتعلم في أرقى المدارس العلوم والسلوك والفكر والتفكير والانضباط والتحضر
وتدرس في أحسن جامعات العالم وتحصل على أعلى الدرجات العلمية في منتهى الراحة وبخدمة مميزة وتحت إشراف أكبر العلماء علما ومعرفة
بالمال تنتقي أجمل جميلات العالم وأحسنهن أصلا وفصلا وتحتفل بعرس ولا في الخيال  وشهر عسل يقطر شهد..
بالمال ستجد دائما من يودك ويزورك ويهنئك في كل المناسبات وبلا مناسبات
ستجد إهتماما غير عادي وحفاوة في كل وأي مكان تذهب إليه
وتعيش حياة مترفة هنية مطمئنة لا تثور ولا تتزمر
حتشرب ماء من أنقى ينابيع العالم وتاكل طعام خالي من أي مواد كيماوية,وبيت ومكتب وسيارة مكيفة مالهاش دعوة بتلوث الهواء ولا غيره
ولو تأخر الإنجاب مفيش مشكلة..بالمال إشتري العلم ..أعمل فحوصات في أي مكان في العالم ..وابتداءا من طفل الأنابيب حتى "إستئجار الرحم" كله موجود وتحت الأمر
ولو حصل زلزال أو حتى مظاهرة في بلدك لا تنزعك..أركب طائرتك الخاصة واتجه فورا لجزر الواق واق واتفرج من بعيد لبعيد
أما لو حبيت تغير قلب أو كبد أو تستبدل كلية برضك مفيش مشكلة ..كله بالمال...
حتى لو جالك_بعد الشر_غيبوبة حتعيش برضك بمالك بالأنابيب وأجهزة التنفس ..لغاية لما فلوسك تخلص
بالمال يقام لك جنازة- بعد طول عمر- فخمة ضخمة يحضرها علية القوم والمشاهير
بالمال تحيا حياة سعيدة  مرحة فرحة مديدة ..
أما الفقير...
لو إتعلم...فرضا..حيطلع جاهل لا يعرف حتى يكتب اسمه من المدارس المجانية العظيمة
حيطلع  متعلم حاجات تانية غير العلم...ابتداءا من "الصراع" على كرسي بالفصل وانتهاءا بتكسير كل ماهو للغير..وتحطيمه
حتتجوز اللي ترضى بيك وبغلبك وفقرك..تصور حتكون ايه يعني إلا أغلب منك وأفقر
وتسكن في عشه او شقة اوضةوصالة وعفشة ميه وربنا يسترها معانا  ويقينا شر الزلازل والإضرابات والقلق والعطلة عن أكل العيش والأجر اليومي
لن تجد من يودك ولا يسأل عنك فأقرانك زي حالتك مشغولين طول النهار في الجري وراء لقمة العيش ويادوبك يروحوا يترمو على السراير زي القتلى
وطبعا لو قدرك رماك انك  تروح أي جهة لتقضي مصلحة ما حتقابل بكل أنواع الإهمال والتجاهل
حتشرب ماء ملوث  من الحنفية وطعام مسرطن عشان رخيص_لو فيه أكل رخيص أصلا- وتركب اتوبيس ينفث في وجهك دخان الرصاص
وتسلم أمرك لله لو ما خلفتش فالعين بصيرة والإيد قصيرة
وفي الغالب بعد كل الهم والغم والسرطنة والتلوث أما حتصاب بفشل كلوي أو قلبي أو كبدي..نقي اللي يعجبك
وعلى ما تدوخ السبع دوخات عشان تحصل على دور في أي مستشفى مجاني وتلاقي واحد أفقر منك يتبرع ليك بحاجة ...يكون السر الإلهي طلع وعلى طول توارى التراب عشان إكرام الميت دفنه
الله يرحمنا جميعا...