محاورة 2 بين جدي أحمد والشاعر علي ماشي يقول الشاعر علي

بسم الله الرحمن الرحيم
هذه محاوره على حروف الهجاء بيني وبين الشاعر احمد ابو حسين من بني عامر(مدير مطار الباحه سابقا)
وقد ارسلت له بالجوال الاربع الابيات الاولى وقام بالرد واستمرت المحاوره
ملاحظه
سوف اقدمها على جزئين لطولها ..

علي:
الف الوف الناس ياما عرفنا ___ وياكم من الاحباب عشنا وشفنا
في حبهم ياصاحبي قد ولفنا ___ كرام في كل اللوازم وشجعان
البا بدايه هرجنا لك سلامي ___ يابو حسين ان كان جالك كلامي
عشرين يوما بالوفا والتمامي ___ ماجت رسايلكم عسى منت زعلان

أحمد:
التا تلقينا الخبر منت موجود ___ وانت الذي قفلت بابك بمردود
وفي الحقيقه فيك ماهو بمعهود ___ والله اعلم لاتكون انت زعلان
الثا ثلاث ايمان انا عنك راضي ___ ولابنسمع قول سامه وفاضي
وان كان تبغى اثباتها عند قاضي ___ اروح معك للمحكمه ياكحيلان
علي:
الجيم جانا ردكم واستلمناه ___ وحمدت ربي يوم حنا قريناه
وسميت بأسم الله على شان يحماه ___ جانا بسرعه جن خاتم سليمان
الحا حمانا الله من كل فاسق ___ اللي لدرب ابليس والشر عاشق
دايم لسانه في المخاليق راشق ___ ذاك الذي بمصايب الناس فرحان

احمد:
الخا خلقنا الله لأجل العباده ___ ومن يطيع الرب يعطى زياده
هو مكتفل فينا وحنا عباده ___ يالله ترحمنا الى نصب ميزان
الدال دام الود بين المحبين ___ والله يديم الوصل مابيننا بين
ويجيرنا وياك شر الشياطين ___ والي يطيع ابليس هذاك خسران
علي:
الذال ذله المعصيه يتعب الروح ___ راعي المعاصي دايم الدوم مفضوح
لاشفت وجهه قلت لاشك مجروح __ والى نصحته قال انا منك طفشان
الرا ترى في الناس واشي وفتان ___ ماهمه الا قولت فلان لفلان
حامل ذنوب الخلق من كل الالوان ___ وان قلت له ذا عيب طلعك غلطان

تأخر في الرد ابو حسين فأرسلت له هذه لبيتين قبل ان يرسل رده
ماهي بعادادتك تأخر عليه ___ اشوف خيلك صار مبطي شويه
لاباس لمن كان في الامر سيه __ والا مبنشر راس طلعه طليلان
احمد رد
المعذره لو صار تأخير مني ____ لكن عذري جالك الرد مني
والعجله قد قالها انسي وجني ___ ماهي بمن طبع البشر طبع شيطان

احمد:
الزا زلات القدم تاتلافا ___ ولو يزل لسان مايتشافا
يقعد سنين بزلته ماتعافى ___ ياكم (قبيلا) راح في زله لسان
السين سلملي على كل صاحب ___ ترى جليس السوء للسوء ساحب
انصحك لاتمشي معه في المسارب ___ هذاك متردي وخايب وخسران

ارسل احمد تعديل لكلمه (قتيلا) بدل من(قبيلا)
فكان الرد:
رسايلك من غير تعديل زينه ___ وبعد ماعدلت صارت حزينه
في كل مره والرساله رزينه ____ خايف عليها عين حاسد وفتان
ثم استمرت المحاوره..

علي:
الشين شفت الناس عاصي وطايع ____ غير ديار ولاتغير طبايع
والي تطبع بالخنا والشنايع ___ هذاك قوله ياولد سرت شيطان
الصاد صل لفرض في بيت ربي ___ ولاتقل معذور ماشي بدربي
والا فيضينا ابشربنا بي نلبي ___ ماذي صلاة اللي يدور لغفران

احمد:
الضاد ضاق صويحيبي من خروجي ___ قاعد على ركبه يتابع هروجي
يغار ماللي حط حمره وروجي ____ والى رجعنا البيت نلقاه زعلان
الطا طلبت الله حسن الختام ___ يغفر لنا الزلات في كل عام
يالله تكفينا عيال الحرام ___ وتجيرنا يارب من حر نيران

هذه هو الجزء الثاني من قصيده على حروف الهجاء وهي من الشعر النبطي
علي:
العين عيني ماتمل المصــــــايف___ اشتقت للباحه ومريت طــايف
ياما نظرت اليوم فيها لطــــايف ___ كني في الديره على راس بعطـان
احمد:
وشبك نقزت الظا والظا ظليمــه ___ ظني وخوفي لاتكون انت نسيــان
علي:
انا كنت في الطايف وجنبي وليمـه ___ وانا نقزت الظا ولاني بنسيــــان
علي:
الظا ظلام الله على كل ظـــالم ___ اللي لشرع الله والدين عـــــالم
ورغم هذا يستحـل المحـــارم ___ كنه ولد لابليس في صوره انســـان
أحمد:
انت عفيف وانت نفسك عفيفه ___ ماتاكل الا لحم كبش من الظان
أحمد:
الغين غينينا على كل مـــوال ___ والله مع المظلوم في كل الاحــــوال
دعيت ربي ياعلي يستر الحــال ___ والا ستر حالك تراك انت سلطـــان
الفا فهذي قصــتي مالبدايـه ___ يوم اتذكـــر جلسـتي في البدايــه
اكثر هروج الناس كانت وشايه ___ كم كنت اشــوف الما وانا كنت عطشان
أحمد:
ابطا جوابك ياعلي بالرساله ___ جوالكم خربان والا بخاله
والا تكن متعطلا راس شكران
علي :
انا جوابي جايلك بالسهاله ___ والولد يعرف حين ينسب لخاله
والعجله قد قلتها منت نسيان
أحمد:
خذ راحتك يابو محمد شويه ___ وعب بنزينك وزود شويه
وانا معك مرتاح ماني بعجلان
علي:
القاف قابلني في الصبح ثنتــين ___ الله واكبر على الحلا يابو حسـين
في مثل عود الموز والا الرياحـين ___ صديت انا عنهم وقفيت وجعـان
الكاف كنه صابني شبه وسـواس ___ من صبح هذا اليوم مانا مع الناس
يقلون لي جب زيت واجيب بسباس ___ اخاف انا ياحمد يكن صرت ولهان
أحمد:
اللام لاترقــد بليـا فراشـي ___ ولاتطاوع كل واشـي وراشـي
والا هبطت السوق خذ لحم حاشي ___ يغنيك لحم الهوش عن لحم خرفان
الميـم مرينـا بـوادي العقيقـي ___ قضيت به وقت انا وياصديقـي
مرتاح ماحسـيت يـوم بضيقـي ___ والله كفانـا شر حاسد وفتـان
علي:
النون نامت عين من بات خــالي ___ لاله همــوم ولاهوى بات سالي
عزي لمن حاله شقى مثل حـالي___ احصي نجوم الليل وابات سهــران
الواو وين الي شكالي واشاكيـه ___ ولو شكالي صاحبي رحت اواسيــه
واقول انا مهموم مثلك اداريـه ___ يالله تعافي كل مهمـوم حــزنان
احمد:
الواو وشلك ياعلي بالعـــراوي ____ ان كان تبغي للجبل والخلاوي
انصحك يابن ماشي ان كنت ناوي ___ علق بلند كروزر والا بنيســان
الياء يالله تجمعنا بجنات فــردوس ___ وتجيرنا يارب من يوم عبـــوس
يوم شيب الطفل وتشيــب روس ___ هذا ختـام كلامنـــا ياالعليان