من شهرين تاصل بيا صاحبي فالتلفون..كان عندوا امتحان واش يتقبل فالسلك الثالث فلافاك..قال ليا مقبلوهش فالشفوي غير باقي عند دوزييم شونص..الله ينجحوا.. هاد الدري مشي انا للي كنقلوها بوحدي..فلان الله يعمرها دار ومعقول..من جهتي يمكن نحسب ليه شحال من ساعة غيب فالاعدادي والثانوي محدودة..عمرو مخسر ولا تساب مع شي حد من غيري بالطبع..

هاد امتحان ديال طروازيام سيكل نجح فالكتابي حيت غيز ليهم كلي ملقاو سبة يطيروه.. ولكن ولابد يلقاو لبنادم سبة فالشفوي..دخل سولوه جاوب بغاو يخلعوه لقاوه كاوي على الخالعة..قالو ليه سير الله يعاونك مزيان..طلعات النتيجة لقاهم شردوه..ولكن كيما قال راه باقة فرصة ثانية وراه نجح فيها وعندو امتحانات دابا الله يعاونو..

هاد الشفوي سواء فالخدمة ولا لقراية مشكلة..دابا مبقاش الشفوي فلافاك..دزت عامين شفوي تما ولكن دزت جبهة..كيعاودوا ليا الدراري للي دازو من ديك المرحلة على أساتذة ديال السلك الثاني كانوا كيجيو سكرانين ولا معطلين..شي وحدين كيطرحوا أسئلة لا علاقة..شي أساتذة دوزوا صغرهم قراية دابا باغين يعيشوا المراهقة ويديروا علاقة صحة..ولا كيحرجوا شي واحد يقولوا ليه شحال عندنا من درهم فالمغرب.. الدري كيبقا يحسب فنسب التضخم والاحتياطي ويعرق  وينشف..فالأخير كيقول ليه الاستاذ سير أولدي تالعم الجاي فهاد الوقت  ..كاينين جوج دراهم درهم كرافاط درهم بلا كرافاط..

واحد الدري كيعاود ليا دخلوا عند استاد فالجنائي واحد لفاسي صكع.. هما ربعة دراري ودرية..الاستاد شاف الدرية اخوانية وكتحشم.. سولها على الاغتصاب..قالت ليه التعريف القانوني..هو يقول ليها انا مكنفهمش شرحي ليا معناه بالدارجة..الدرية بدات كتحمار وتخضار بعد جهد جهيد شرحات ليه بالدرجة وبيديها.. باغة تنجح مسكينة.. هو يقول ليها نتينا مكتحشميش شرحي ولكن بلا فرشة..حط ليها نقطة بحال وجهوا.. ولكن نجحات من بعد كن حط ليها صفر وخا طير مع الطيور متنجحش..

أما لنتروتيان ديال الخدمة خلاص...كاين للي كيدخل وشاداه الرعدة فالمعدة..وكاين للي عندو كود بيسطو صحيح عارف راسو ناجح.. انا دوزت كونكور فالمطار أنفا .. الناس حاطين فلوس ينجحوا والوالد حاط فلوس غير باش ندوز كونكور..واحد الدري نهار كلوا كيرد فحوايجو ونجح من بعد.. ولا واحد الدري من الدرب برج الدلو..سطل..مشا يدوز وحاط الصرف..كان مريض..كيسولوا داك للي كيوز..الدري شاد راسو  وكيقول ليه..كاينة سير عالله..كاينة سير عالله..السيد قال ليه فالاخير ولدي سير  عالله دزتي..يعني بلا صداع عندك فوس ولا معرفة.. تعيش م...ولكن كاين من فوق هادشي كلوا ربي.. توكل على الله  واعقلها..