محتويات الإدراج الذي تريد إرساله:
حوار ديال بلعاني مع فيصل العرايشي...
 نْبداوْ معاك آسي العرايشي من الأزمة المالية الخانقة التي تتخبطون فيها. آش واقع بالضبط؟
* ولاينّ على منحوس! زعما ما لقيتيش ﮔـاع باش تبدا غير هاد السؤال هادا. على كل حال غادي نجاوبك، وسأكون معك صريحا إلى أبعد حدّ. اللي وقع آخويا هو أننا قريب نهزّو يدّينا فوﮒْ روسنا، ما بقا عندنا باش نخلصو الما ولا الضو، ما لقيناش باش نخلصو الناس اللي خدامين معانا. باختصار شديد خوك قريب يـﮕول بّاع!
- فين كاتمشي فلوس الدعم الحكومي؟
* كاتمشي مع الواحد ديال بورﮔـراﮒ! آسيدي الحكومة شحال هادي وحنا كانتسناو تعطينا واحد ميّة وربعطاشر مليار وما بغاتش، باش بغاونا نخدمو؟ بالحجر!
- هناك من يقول بأن الحكومة قطعت عنكم الدعم لأنك لم تقدم حصيلة العقد البرنامج الذي انتهت مدة صلاحيته في السنة الماضية؟
* ماذا سأقدم لهم يا أخي؟ إنهم يرون كل شيء بأعينهم على قنوات القطب العمومي. الأصداء التي تأتيني من مشاهدي قنواتنا تقول بأن ما نقدمه ما فيه ما يتشاف، بحال الكمّارة ديال عام خمسة وربعين! لذلك لا أريد أن أغامر بتقديم حصيلة العقد البرنامج، حيت حتى هو ما فيه ما يتسمع ولا ما يتشاف! والنهار غادي نقدمو فالبلاصة غادي يطيروني! هادشي علاش أنا شادّ الحساب ديالي مزيان وعارف آش كاندير. أؤمن بمقولة "قيس لا تغيس"، وأؤمن أيضا بمقولة "التأني من الرحمان والعجلة من الشيطان". هذا لا يعني بطبيعة الحال أنني مرتاح، بالعكس، والله ما نخبيش عليك آخويا يْلا ﮔـلت ليك كانحسب راسي دابا بحال شي طلاّب، غير هو السعاية كاطلبو شي ربعا ولا عشرة دريال، وانا كانطلب عشرات الملايير!
- ما هي الإجراءات التي تعتزم اتخاذها للخروج من هذا المأزق؟
* طبعا كاينين بزاف ديال الإجراءات، منها على سبيل المثال أن العاملين في جميع قنوات القطب العمومي ما غادي يشدّو من عندي فرانك واحد من دابا للقدّام، يعني غادي يجربو يخدمو في سبيل الله، واللي ما عجبوش الحال نـﮕول ليه الباب آلحباب! المجموعة الوطنية لكرة القدم حتى هي كاتسالنا واحد جوج دْ الملاير كحقوق للنقل التلفزي، ولكن ما غاديش يشمّو من عندي ريال واحد هاد الساعة. نفس الشيء ينطبق على المكتب الوطني للكهرباء، باش يطلع ليهم الزعف ويقطعو علينا الضو، ديك الساعة الحكومة بزّز منها تعطينا رزقنا، لأنها بحاجة ماسة إلى من يضع لها المساحيق بالليل والنهار على وجهها المترهل، وهي المهمة التي لا نقوم بشيء آخر سواها!
- وأين تذهب عائدات الإشهار؟
* فينا هو بعدا الإشهار؟! واش فراسك بللي العائدات ديال الإشهار نْقصات عندنا في الشهر الماضي بأكثر من 34 بالمائة؟ هذا لا يعني بطبيعة الحال أن المعلنين يتناقص عددهم في السوق، المغرب يعرف توافد عدد كبير من الشركات، ومع ذلك يتناقص عدد المستشهرين على التلفزيون، لأنهم بكل بساطة كايحرﮔـو بمنتوجاتهم لعرضها على شاشات القنوات الأجنبية!
- علاش؟
* حيتْ القنوات ديالنا، حسب ما يقولون، لا يشاهدها أحد، أو بالأحرى ما بقاو كايشوفوها غير الناس اللي ما زال ما عندهومش الـﭙارابول. هذا السبب يجعل المعلنين يقتنعون بأن الأموال الني يصرفونها من أجل الدعاية لمنتوجاتهم على قنواتنا تضيع هباء منثورا، بحال يْلا كاتكبّ الما فالرملة، أو كمن يؤذن في مالطا!
- هل أنت من مشاهدي قنوات القطب العمومي الذي ترأسه؟
* في الحقيقة أنا لا أحب أن أكذب، لكنني سأفعل هذه المرة، وسأقول لك بأنني أشاهدها!
- زعما ما كاتشوفهاش ﮔـاع؟
* أخبرتك آنفا أن الذين يشاهدون قنواتنا هوما الناس اللي ما عندهومش ﭙـارابول، وأنا على كل حال عندي ﭙـارابول! كانتمنا تكون تفهم غير بالإشارات، لأن شرح الواضحات كما يقولون من المفضحات!
- وهل تقرأ ما ينشر في الصحافة عن القطب؟
* طبعا، لدي فريق مكلف بقراءة كل ما يكتبه الصحافيون عمّا نقدمه للمشاهدين، ولكننا على كل حال لا نأخذ ما يكتبه الصحافيون بعين الاعتبار!
- وما الجدوى من قراءة ما يكتبون إذن؟
* الهدف من ذلك هو أننا نريد أن نعرف من يمدحنا ومن ينتقدنا. اللي كايمدحو فينا مرة مرة كانعرضو عليهم باش يحضرو للبرامج ديالنا، واللي كاينتاقدونا ما عمّرهم يحلمو يشوفو كْمامْرهم فالتلفزيون ديالنا! عندنا واحد اللائحة كحلة، اللي ﮔـال فينا شي حاجة ما عجباتناش، كانرميوه فيها!
- لكنك ترأس تلفزيونا عموميا وليس خاصا كي تتصرف بهذه الطريقة؟
* حْنا فالمغرب ما عندناش فرق بين ما هو خصوصي وما هو عمومي! كلشي بحال بحال، واللي ما عجبوش الحال ينطح راسو مع الحيط ولاّ يمشي يشرب الما ديال المحيط الهادي!
- كاينة واحد القضية ما مفهوماش آسي فيصل، وهي أنكم تعيشون أزمة مالية خانقة، ومع ذلك تدفعون الملايير لبعض أصحاب شركات الإنتاج المحظوظين. اشرح لينا هاد القضية يْلا سمحتي..
* هادوك الناس ما نقدروش نـﮕولو ليهم را ما عندناش باش نخلصوكوم دابا، كما نفعل مع مّالين الضوّ والكرة والناس اللي خدامين معانا، لأن علاقة الصداقة والزمالة والأخوّة التي تجمع بيننا تمنعنا من ذلك!
- ألا ترى أن المغرب ليس بحاجة إلى كل هذه القنوات التي تقومون بتفريخها؟
* أنا متّافق معاك فهادي، ولكن آش غاتدير آخويا، حتى حْنا بغينا نزعتو شوية، وعندما اكتشفنا أننا لا نستطيع أن نخلق حتى قناة واحدة في المستوى، ﮔـْلنا علاش اللي ما نبقاوش نخلقو القنوات بلا قياس، عملا بمقولة ما نايضاش ما نايضاش..اللهم نزيدو نغرّقو باباها!
- شرعتم مؤخرا في ترجمة المسلسلات التركية والمكسيكية إلى الدارجة المغربية، شكون مول هاد الفكرة؟
* الشيطان آخويا! جميع بلدان العالم تسعى إلى الحفاظ على هويتها في ظل العولمة، وحْنا داك شوية ديال الهوية اللي بقا لينا ها حنا مدّينها فيه باش نغبروه، ونولليو بلا هوية بلا ثقافة، بحال يلا مقطوعين من الشجرة!
- عشية إعلان نتائج الانتخابات الجماعية كنت حاضرا في ضيافة الهمة، ألا يجدر بك أن تكون محايدا في مثل هذه المواقف؟
* في المغرب إذا تم تعيينك في منصب ما، يجب عليك أن تكون دوْما مع الجهة الرابحة، داكشي ديال أخلاقيات المهنة وما جاورها لوحها فالمجمر، وإلا غادي يهزك الما!
- ختاما نودّ أن نعرف ما إن كنت صادقا عندما هددت بالاستقالة من منصبك إذا لم تفرج الحكومة عن الدعم؟
* وايلي حتى انت الريح! ديك الهضرة غير زلقات ليا وصافي، كون لقيت أخويا نرجعها لبلاصة فين خرجات غادي نرجعها، ولكن ضوماج ما نقدرش، الناس ﮔـالو ليا بللي كاين واحد المثل كايـﮕول بللي سخونية الراس كاترجع على مولاها بالبرودة، أنا دابا راني بارد، ماعرفت واش غير من الخلعة ولا شي حاجة نّيت جاية فالطريق! أنا مْزاوﮒ فيك آخويا يلا ما دْعي معايا تخرج هاد البرودة على خير!
|
