محتويات الإدراج الذي تريد إرساله:
حوار ديال بلعاني مع شكيب بنموسى (نقلا عن الملحق الساخر ليومية "المساء")
- السي شكيب، دابا سالات الانتخابات، ارْتاحيتي شوية؟
* علاه ﮔـالو ليك كْنت مبرزط باش تسولني واش ارْتاحيتْ ولاّ لا؟ أنا آسيدي ديما مْرتاح مع راسي، هاد الصداع ديال الانتخابات يْلا بْرزطك انت أنا بعدا ﮔـاع ما مسوّق ليه!
- زعما؟
* بصحّ كانهضر معاك! صحيح أنني كنت أتوصل بكثير من الشكايات التي تشكي فيها الأحزاب بعضها البعض. كل نهار كايجيني عرّام ديال الشكايات، ولكن حتى أنا طولانطي مع راسي، ديك الشكايات كاملة مللي كاتوصلني كانصيفتها ديريكت لاّﭙّـوبيل باش نتهنا مع راسي وما يعمرش ليا مخّي بقوّة المشاكل!
- ولكن المفروض فيك كوزير للداخلية أن تتدخل لحل هذه النزاعات. ولاّ لا آسي شكيب؟
* متافق معاك فهاد القضية، ولكن خاصك تقرا دوك الشكايات تشوف باش عامرة، تـﮕول غير الدراري الصّغار اللي كاتبينها!
- آش كايكتبو فيها مثلا؟
* والو آخويا، الخوا الخاوي! هادشي علاش ﮔـلتْ ليك كانصيفتها ديريكت لاّﭙـوبيل. واش أنا هازّ الباليزا ديال أمّ الوزارات ونْجي ندير عقلي فالدراري الصغار؟ ما يمكنش! كاينة واحد القضية تانية، وهي أن هاد السياسيين ديال جوج فرانك قْدّ ما حاولتي تصالح بيناتهم قّدْ ما كايزيدو يطلعو للسما، بحال يْلا كاتصبّ ليصانص فوﮒْ العافية! حيت كايْـﮔـولو مع راسهم مللي وزير الداخلية مْهتمّ بنا هي عندنا قيمة كبيرة. داكشي علاش حتى أنا ما مسوّق ليهم باش يعرفو بللي ما كايسواوْ حتى بصلة! ومللي كايجي عندي شي واحد يشكي ليا المنافس ديالو كانـﮕول ليه بيناتكم آبيضاوة، فكّوها بالعصا ولاّ بالهراوة!
- مللي انت مرتاح حتى لهاد الدرجة، علاش راسك ما بقات فيه حتى زغبة كْحلة؟
شعري بْياض آمولاي بالمشاكل الشخصية ديالي ماشي بالمشاكل ديل لْخرين! الشيب اللي كاتنوْضو المشاكل ديال الوزارة كايخرج غير مللي كانسمع على شي تعديل حكومي! ديك الساعة ما نخبّيش عليك، كانوقف قدّام المراية فالحمّام، وأرى البياض بشكل مباشر يجتاح ما تبقى من الشعيرات السوداء في رأسي، بحال داكشي ديال أفلام الخيال العلمي!
- هل حدث لك هذا الأمر خلال هذه الأيام التي كثُر فيها الحديث عن تعديل حكومي وشيك؟
* لاّ، حيت الشعر ديالي دابا ولاّ كولّو بْيض، يْلا غادي يتبدّل باش يوللي خْضر ما نعرف! ولكن أخبار التعديل الحكومي على كل حال لم تمر عليّ مرور الكرام، شوف أخويا الجبهة ديالي شحال تزاد فيها ديال التجاعيد!
- ما كاتفكرش تدير شي عملية تجميلية بحال برلسكوني؟
* هاد الفكرة طاحت ليا فراسي شحال من مرة. غادي نوللي زوين يْلا درتها ياك؟! ولكن العقلية ديال الطاليان ماشي هي ديال المغاربة. أنا النهار يشوفوني الناس داير شي عملية تجميلية غادي يـﮕولو السّي شكيب ما عندو عْقل! أو في أحسن الأحوال عاد إلى أيام المراهقة! وباش نجيك للصراحة، سأعترف لك بأن منظر وجهي في الواقع لا يوحي بالصرامة، وبما أنني أوجد على رأس وزارة الداخلية كانحاول نبقا ديما مغوبش غير بلعاني، حفاظا على هيبة الوزارة التي أحمل حقيبتها! حيت هادو غير يشوفوك كاتضحك كايسحاب ليهم انت بوجادي!
- ومع ذلك التغوبيشة ديالك ما نفعاتكش مع الهمة، صحيح؟
* يْلا كان ممكن نفوتو هاد الموضوع راه كايطلُع ليا الطانسيو!
- هيا بقا فيك الحال على ودّ داكشي اللي دار ليك؟
* وعلاه لاّ؟! معلوم بقا فيا الحال آصاحبي، بزاف ﮔـاع! هاداك السيد دار ليا واحد البهدلة عمرني ما غادي نْنْساها. اللي بقا فيا بزاف هو أن تْلاتين مليون ديال المغاربة ساقو ليها الخبار، الشوهة كانت كبيرة، هادشي علاش ما غاديش تْصرط ليا واخّا ندوزها بالما القاطع! ولكن غير خلليه، والله لا بْقات فيه، بالي ما غاديش يتهنا حتى نردها ليه مضوبلة عْلى عْشرة!
- تْـﮕدّ عليها زعما؟
* المهم أنا ناوي نردها ليه، واش نقدر ولاّ ما نقدرش ماشي مهم، اللي مهم هو الواحد ينوي يدير شي حاجة والكمال على الله. وعلى كل حال أنا من المؤمنين بأن النية أبلغ من العمل، خصوصا عندما يكون الانسان في موقف ضعف!
- لكنك لم تكن لتتراجع عن قرارك خصوصا وأنك كنت مسنودا بقانون يمنع ترشيح النواب الرحل بشكل واضح؟
* آودّي حتى انت القانون فهاد البلاد داير بحال العجينة، يْلا عندك جدّاك فالعرس تقدر تطويه وتدير فيه الشكل اللي بغيتي!
- علاقة بالانتخابات دائما، كيف تنظر إلى الفوضى التي رافقت الحملات الانتخابية؟
* الروينة وصافي! أنا أظن أن لأشخاص الذين يقومون بالاعتداء على الآخرين مستعملين كافة أنواع الأسلحة البيضاء فاهمينها غلط. هادوك اللي خرجو دايرين مظاهرة بالحمير وطيرناهم فالبلاصة حتى هوما فاهمينها غلط، هادو مللي كايلقاو واحد الهامش ديال الحرية كايسحاب ليهم الدنيا سايبة، وأنا لا أفهم من ذلك سوى أنهم يحنّون إلى عهد الزرواطة والشيفون والطيارة القرعة وما جاورهما!
- زعما هاد الحوايج ما بقاتش دابا ولاّ كيفاش؟
* نفوتو هاد السؤال يلا كان ممكن الله يخلليك!
- طيب، باعتبارك مديرا سابقا لأكبر شركة للخمور في المغرب، ألا ترى أن الخمر قد يكون له دور في أعمال الفوضى هذه؟
* ما نْضنّش! كون ﮔـلتي الحشيش ولاذ القرقوبي أنا متّافق معاك، ولكن الشراب موحالْش! ماشي كاندافع عليه، ولكن ماشي غير حْنا اللي عندنا الشراب. عرفتي ما تْدير، بدّل ﮔـاع هاد الموضوع حتى هو عافاك!
- يْلا سمحتي بغيناك تْشرح لينا كيفاش حْنا فبلد إسلامي ومع ذلك ننتج أربعين مليون قرعة ديال الشراب كل عام؟
* هاد السؤال آخويا دّيه عند الفقهاء ديال المجلس العلمي الأعلى!
- السي شكيب شكرا جزيلا.. وقبل أن نختم أسألك أخيرا إن كنت معجبا ببرنامج أحد الأحزاب، وهل ستصوت لأحدها؟
* طبعا غادي نصوّت، ماشي حيت أنا مقتنع بشي برنامج معين، حيت البرامج كلها بحال بحال كي الحريرة ديال رمضان، ولكن غادي نصوت لواحد الحزب، باش نقلي السم لواحد مول حزب آخر حيت عندي معاه شي حساب! طبعا الصوت ديالي ما دّا ما جاب، ولكني سأفعل ذلك فقط من باب التقلاز من تحت الجلابة!
|
