محتويات الإدراج الذي تريد إرساله:
هو الريس زعلان ليه ؟؟!
 هو الريس زعلان ليه ؟ يعني هي الخيبه جديده علينا ولا مش متعودين عليها ؟ ابدا ..ابدا ده احنا بقينا شعب مدمن خيبه !!
قال سعادته شايل الهم ومتنكد وقاعد في الأوضه ضارب بووز علشان بعثة مصر فشلت في اوليمبياد بكين ؟ يا سلام يعني من امتي احنا فلحنا تحت حكمه ولا من امتي ربنا اكرمنا وسيادته بيبرطع في البلد .
يابوعلاء هون عليك وانزل كده اضربلك حجرين بوري في اي قهوة شعبي هتلاقي ان الشعب ولا واخد باله خالص من موضوع الاولمبياد ده !! وان شعبك الطيب الصبور المهاود في حاجات تاني منكده عليه عيشته ومسوده ايامه .
طبعا مش هاقول ان سيادك يا ريس وعيلتك الكريمة من اهم اسباب النكد ده -لا العفو- ينقطع لساني قبل ما ينطق كلمه زي كده يا ريس !
لكن في حاجات تاني زي العيال اللي مش لاقيه تاكل ولا تلبس والشباب اللي اتسعر من قلة الجواز والبنات اللي بتتجوز ومحدش عارف بتتجوز مين وتكتب الولد باسمها في شهادة الميلاد .
طبعا في حاجات تاني زي المساكين اللي عيالهم ماتوا في العبارة واللي عيالهم ماتوا في البحر وهم هربانين من البلد واللي عيالهم ماتوا في حرايق القطارات واللي عيالهم ماتوا بالسرطان واللي عيالهم ماتوا في البلاعات واللي واللي واللي .....يووووه انا مش عاوز اضايقك اكتر مانت مضايق.
طبعا اكيد حضرتك يا عمنا اول مرة تسمع عن الحاجات النكد دي !! لأنك لو سمعت عنها كنت اكيد هاتزعل وتبعت تعمل لجنة زي بتاعة بكين واكيد برضه لوانت بتسمع كل حاجه كان زمالك جالك سكر وضغط ويمكنن شلل نصفي خاصة وانت في اواخر عداد عمرك !!
شايفك مندهش من كلامي وبتقول : هو الصعلوك ابن ال...ده بيتكلم علي انهو بلد بالظبط ؟! وانها هارد عليك ياريس يامتريس جوه حشانا : انا بتكلم عن بلد كان الناس بيعملولها الف حساب بقيت والفضل ليك زي العيل ابورياله كل الناس بتضحك عليه وماحدش عامل له حساب!
طيب بذمتك يا جدي سمعت عن اللي بيعملوه ظباط البوليس مع شعبك اللي صابر عليك وعلي اللي ..طيب سمعت عن الناس المحترمه اللي لا سرقت بنك ولا غرقت عبارة ومع ذلك اتحاكمت بمحاكمه عسكريه علشان قال ايه بيقولوا: لا
مفيش داعي اصدعك بموضوع غزة ولا السودان ولا لبنان ولا ولا ....انا شايفك زهقت مني ومن اللي خلفوني ...علي اي حال انا مش عاوزك تزعل نفسك قوي علي موضوع المونديال يا ريس .....وربنا لا يحرمنا من الخيبه في عهدك يا ...يا...يا ريس
|
