أكل ومرعى وقلة صنعه ..

هذي هي حياتنا ..

شو انتجنا ؟؟

شو سوينا ؟؟

شو عطينا ؟؟

خلونا نفكر لحظة ..

ونقتل هالروتين اليومي ..

اللي بيقتلنا من الملل والضيق ...


علينا بالجد والجدية ..


الحياة لها معنى ..

تذوق كل لحظة وساعة ودقيقة وثانية فحياتك بالعمل ..

بتكسر الملل ..

وبتتحسر على كل وقت ضيعته فالرقاد والخمول والكسل والروتين ...


بصراحة ما احب أقارن نفسنا بالغرب ..

لان هالقوم لهم سلبيات كثيرة ..

ولكن لو نشوف نقطة من الايجابيات ..

بنشوف ان هالناس يحبون استثمار الوقت في أي عمل ..

أو مشروع او قراءة ...


* بعطيكم مثال :


نحن يوم نشوف الاجانب طالعين رحلة لازم يشلون وياهم كتاب للتسلية ..

ومرة شفت برنامج للديكور .. وحده حاطة كتب في غرفة الضيوف عسب يتسلون أو يتثقفون ..

واذا ركبوا القطار او الباص يفتحون كتيب ..

ويا كثر اللي منتسبين فالمكتبات ..

........... الخ من الصور والنماذج ..



أما نحن ولله الحمد اللي يبا يتعلم منا ياخذ منا الكسل وقلة الثقافة ..

لو اقول لواحد طالع رحلة خذ وياك كتاب عسب تتثقف ..

أو اقوله انتسب في أحد المكتبات في وقت الفراغ ..


أو ...... ....... أو ... ... الخ .


أكيد بينعتني بالخبلة ..

لأن الكتاب عندنا او التثقف ملل وضيق ..

الكتاب بس للمدرسة والدراسة ...


ويا حبنا لمجابل النت والشات من دون فايدة ..

أو نيلس نهذرب لساعات فالتلفون ..

أو نحوم فالمراكز شرات المخبل ..

أو نتابع اخبار رنات الموبايلات والصور ..


العرب ..


بشكل عام ما يهتمون بالوقت .. ولا بقيمة الوقت ..

لو تواعد شخص الساعة 6 بيوصل الساعة 7 أو 8 ويخليك تترياه على نار .. ويوم تحرج عليه بيرد :


بلاك مشوط الدنيا ما بتطير !!!!!!


دومنا نشوف الاجانب اللي يستثمرون فالبلاد ..

يوصل هندي حافي منتف وياخذ من المواطن الرخصة ..

المواطن يستلم الايجار آخر كل سنة ..

اما العامل فيكد ويكافح ويعمل ..

اما المواطن يقول :

شو لي بالصدعة والمشاكل ..

وعقب كمن سنة العامل صار ارباب وعنده كم محل ..

والمواطن محلك سر ما يبا يتلحلح ..

ولا يحب يستثمر ويجابل المحل عسب محد يعايره ..



هذا هو حالنا ...

وما زلنا ما نشوف النقص الفكري والحضاري ...

لكن اذا تبا تشوف العربي ..

سير شوفه في بلاد الغرب ينجلب لشخصية ثانية ..

كل هذا مسايرة للأجانب ..



يا أخواني .. ويا خواتي ..

خلنا نفتح عيونا .. وندرك ان الحياة هب دراسة وشهادة وعمل نترزق من وراه ..

الحياة أكبر من جذه ..

استغل كل لحظة ..

وثقف نفسك ..

وافتح مخك الفاضي وزوده بالعلم ...

خلك حضاري واترك الكماليات والتوافه ...


حزتها بتدرك أنك حققت اللي تتمناه ...

وبتفهم نفسك وبتحس بمعنى الحياة ..


هذي رسالتي .. واتمنى نفتح صفحة جديدة ونراجع نفسنا ...


مع التحية ...