محتويات الإدراج الذي تريد إرساله:
شن تحكي ؟! شعر باللهجة الليبية
شن تحكي ؟!
جلال عثمان
شن تحكي ؟!
أنتِ في أول الجملة
وأنا الساكن
لقانا يخرب المعنى..
شن تحكي ؟!
أنتِ واحة وتبي العذب ونا الآسن
قصيدة شعر واستعصت على النفري
وديك الجن
والعبسي..
قصيدة تجاوزت لبحور
والمنثور
والشعبي..
قصيدة ما يروضها ولا المحكي..
وأنا مازالت تقليدي
وعاروضي..
أنتِ تبي اللي يقدح زناد الحرف
يفض بكارة الكلمة
ويهتكها
سطّاش الفراهيدي (1)..
*** ***
إنقول الطير لو يعشق الحورية
إيديروا العش ع الشجرة ؟
وإلا تحت لمية؟
كلام بعيد يا بنية
ولكن حق
مش حكي التخاريف
لأن هاذي شخصيتي بلا تزييف
وهاذي لهجتي زاوي
بلا تحريف
وما نفهمش في أليوت
لا سيزيف (2)
وإلا إنقول أبصر كيف (3)
ولاني فارس لـ ( ليلى ) و لا جولييت
هذا حد هاللي عرفت
وهذا حد هاللي قريت
أنا أوزاني
لمربع ولمثلث وبورجيلة
وما عنديش
غير فاضل وبلقاسم وماجد خوت (4)
ولو نطلع من بحوري
أكيد إنموت
شنننننننننننن تخرفي ؟!
ــــــــــــــــــــــــــــــــــــــــــــــــــــــــــــــــ
1) سطّاش الفراهيدي: بحور الخليل الستة عشر.
2) في مهرجان الجيلاني طريبشان 2008 ، القاص عمر الككلي قال: أن شعراء المحكية مثقفون لأنهم يعرفون سيزيف.
3) أبصر كيف: ديوان للشاعر محمد الدنقلي.
4) أنا والليل خوت: ديوان للشاعر سالم العالم
|
