....سؤال؟ 

التدين يعنى إيه

ده سؤال ومش لاقى الإجابة

من زمان فكرت فيه

هل يا ترى إحنا غلابة

واللا ديننا ناقصه إيه

طب ليه بنبكى ع الصحابة

لما نسمع كانوا إيه

إحنا ديننا ما فيه معابة

العيب ده فينا وإحنا فيه

      ********

التدين يعنى إيه

هل عباية وطرحة واللا

واللا لحية وسبحة واللا

واللا نفس مسامحة واللا

واللا ذل الدمع في ليل البكا

و الناس نيام..لما تناجيه

واللا هوا كل دولا

واللا إيه

الصورة لسة ناقصة حاجة

برغم بروازها الجميل

ملامحها غطتها السحابة

بقيتها ضايع منَا ليه

     *********

التدين يعنى إيه

الرد لسة هييجى مني

التدين هوَ إني

أغرس الإيمان فى قلبي

غصن بالإخلاص راويه

لجل ماصنع فلك جامد

حمل وطني أشيله فيه

واحضن المجداف و هوَ

فرضي وبحافظ عليه

دعوة الله وذلي ليه

هو ده اللي ها عدى بيه

هو ده اللي ها عدى بيه

      ********